Июньдалул 28-нний Дагъусттаннал БакIчи Сергей Меликов хьунаавкьунни Украиннал аьрщарай хасъсса дяъвилул операциялул чIумал бурж бартбигьлай ливтIусса дагъусттанлувтурал кулпатирттащал. Региондалул каялувчинал ва властьрал органнал вакилтурал тIутIив дирхьунни аьраличутурал суратирттачIа. Мачча-гъанссаннахь жижарагу бувну, Дагъусттаннал БакIчинал увкунни, Аьрасатнал Федерациялул цашиву дуруччаврил цIаний талай бивкIсса дагъусттанлувтурал дакI марцIну ва сивсуну биттур буллай бур цала аьралитурал бурж. Миннал ккаккан дуллай бур талатавриву чувшиву ва къучагъшиву, Ватандалун дакI тIайлашиву. Дагъусттанлувтураву чIявусса бур виртталсса оьрчIру. Вайннал ккаккан буллай бур гьунар, цанчира зу вай ва куццуй тарбия бувну тIий, вай буну тIий хIакьсса зунтталчутал ва миннан ххирану буну тIий Буттал улча, Ватан.
БавтIми пахъ багьунни ца минутIрайсса ливтIуминнал хIурматран.
Дагъусттаннал БакIчинал бувсунни бюхъайсса кумаг бантIий бушиву аьралитурал кулпатирттан.
Махъру лавхъунни мукунма ДР-лул аьраяллил комиссар полковник Дайтбаг Мусттапаевлул, ДР-лул захIматрал ва социал иширттал министр АьбдурахIман МахIмудовлул, Къизилюртуллал шагьрулул бакIчи МахIаммад МахIаммадовлул.
Сергей Меликовлул Чувшиврул орден дуллунни къуллугърал бурж биттур буллай жан дуллусса аьраличунал ниттихьхьун ва арснахьхьун. Награда дулаврил хIакъиравусса ХIукмулий къулбас дурссар Аьрасатнал Президент Владимир Путиннул.