Жижара

ХIамидлул душ Гъаранова Мисиду

Июнь зурул 6-нний, захIмат­сса цIуцIаврища ххассал бан къабювхъуну, ахиратрал хьунни ххаллилсса тIул-тIабиаьтрал, хасиятрал заллу, ЧIяйннал жяматран ххиранува ливчIсса ХIамидлул ва Рукьижатлул душ Гъаранахъал Мисиду.

Мисиду бувну бур 1962-ку шинал Туркманнаву, Чарджоу шагьрулий. Мисиду бувну кIива зурува, ноябрьданул 7-нний, апатI хьуну, ахиратрал хьуссар 25 шинавусса ппу ХIамид. Бу­ттал лажин къаккарксса цала душнил душ Мисиду цачIанма бувцуссар ЧIяв ялапар хъана­хъисса Багъатирхъал Абумуслиннул ва ПатIиматлул.
ЧIяйннал дянивмур даражалул школагу къуртал бувну, Мисиду дуклан бувхссар Машлул техникумравун. Зий бивкIссар личIи-личIисса дахху-ласулул идарарттай. Чув зий бухьурчагу, Мисиду бия уздансса, низам ххирасса, цаманал хIурмат бан анаварсса, ххаллилсса тухумрал аьдатругу дуручлай, оьрму бутлатисса инсан.
1981-ку шинал Гъарана­хъал Аьлищал ташугу бувну, ялапар хъанай буссия Каспийскалий. Ужагърайсса цачIушивугу, паракьатшивугу тарбиялунсса дуссия вайннал. Каспийскалий ялапар хъанахъисса чIяйннал ванийн учайссия «жулва Мисиду» куну.

Цила ххаллилсса лас Гъаранахъал Аьлищал шанма душ хъунигу бувну, ххуйсса тарбиялущал дуккингу бувну, оьрмулул ххуллурдай щаллу бувссар.
Дахьва оьрмулия неъмат ласласисса дунияллий, цIуцIи шанийн багьну, сайки шанна шинал мутталий азарханардай, махъсса чIумал Бурденкол Центрданий буссия. Лап хъунма­сса хIарачат бивхьуна ниттил Рукьижатлул, ласнал Аьлил, уссил МахIаммадал ва хъин буллай. Амма Аллагьнал чивчумунин чаран лякъин къашай.

Гъаранахъал Мисиду ахиратрал шаврил жижарагу буллай, дакIнийхтунусса кьурчIишиву кIидачIлай буру ниттихь Рукьижатлухь, ласнахь Аьлихь, уссихь МахIаммадахь, ссихь ПатIиматлухь, ласнал ниттихь Аьжахь, душварахь Жамилахь, Рабиятлухь, Мадинахь, куявтурахь, буттарссихь Сагъиратлухь, буттауссурваврахь Аьлихь, Китаблухь, ниттирссурваврахь Сагъиратлухь, Насибатлухь, ниттиуссурваврахь Гьаруннухь, МахIаммадрашидлухь, цинявппагу мачча-гъанминнахь.

Вил чаннасса сипат, аьчух­сса дакI, зунттал душнил ас ва намус ина кIулминнал дакIурдиву личIантIиссар оьрмулухун. Бунагьирттал аьпа баннав. Гьав нурданул дуцIиннав. Амин!
ЧIяйннал жямат


ЯхI гъагъаврищал хъуннассса кьурчIишиву кIидачIлай ура Гъазиевхъал кулпатращал, щалагу Дагъусттаннал агьулданущал, жула аьралий частьрал язиминнавасса аьраличу
Гъазиев Алик
талатаврил майданнив ахиратрал шаврийн бувну. ХIайп! Алик ия хъинну чумартсса, къучагъсса, цайрасса жаваблувшинна кIулсса хIакьсса чув!
Жул аьралий частьраву яхьунтIиссар Аликлул чаннассса аьпа!
Генерал-майор Таймураз Калоев,
Аьрасатнал аьралий гужирдал 43057-мур аьралий частьрал хъунаманал буржру чIумуйну биттур буллалима


Багьауттиннул арс Гъазиев Алик

ДухIан захIматсса кьур­чIишиву ялун дирунни Хъусращиял шяраватусса Гъазиев Багьауттиннул ужагърайн, щала щарнил агьулданийн. Украиннал аьрщарайсса хасъсса аьралий операциялуву чумартну жан дуллуминнавух хьунни оьрмулул зувира шиннагу барткъаларгсса Аликгу.
Гъазиев Алик Багьауттиннул арс увссар сентябрь зурул 7-нний 1992-ку шинал Хъусращиял шяраву. Дуклай ивкIссар Хъусращиял школалий, Къизилюртуллал райондалий­сса ЦIусса Сулакьрал школалий. Гьарца кIанттай Алик инсантурал дакIурдиву ливчIун ур аьмалгу, хасиятгу ххуйсса чIаважагьилну.
Школа къуртал бувну махъ зий ивкIссар Калугалий «УграКерам» заводрай. Тичча увцуссар аьралуннаву къуллугъ буллан. Къуллугъ буллай ивкIссар Наро-Фоминскалий. ДакI марцIсса къуллугърахлу аьралий частьрал хъуниминная нитти-буттайн бувкIссар барчаллагьрал чагъарду. Аьралий бурж лавхъун зана хьуну махъ, тава цува зий ивкIсса заводрай зий хъунма хIал къалавгун, лавгссар Аьра­сатнал аьрали гужирдаву контрактрай къуллугъ буллан.
Хасъсса аьралий операция байбишавривун, ванал бюхъу ва чумартшиву хIисав дурну, ивтун ур взводрал каялувчину.
Мариуполь ва Северодонецк мурахас бувну, Запорожье мурахас буллалисса талатавриву къучагъшиврий жан дуллуну дур Гладкое шяраву.
Хъуннасса чIун къаларгссия Аликлул кулпат бувну.
Цал чаннасса аьпа дакIний личIантIиссар щала Хъусращиял шяраваллил агьулданун. Аликлул нязаннивсса бивкIулул кьурчIишиву кIидачIлай, дакI­ний­хтунусса жижара буллай буру буттахь Багьауттиннухь, ниттихь СахIилухь, кулпатрахь Сакинатлухь, ссурваврахь Маринахь ва ПатIиматлухь, Гъазиевхъал ва Тахакьаевхъал агьлу-авладирттахь. Дулуннав зу­хьхьун Заннал ва захIматсса бивкIу лялиян бансса ссавур! Аликлул рухI хъинний дишиннав, Алжаннул ххари аннав!
Хъусращиял жяматрал цIания АьвдурахIман Адамов


Хъуннасса дард-хажалатгу кIидачIлай, дакIнийхтунусса жижара буллай буру Зулайхат Тахакьаевахь, ххирасса ссил арс
Гъазиев Алик
аьпалухьхьун лагаврийн бувну. Ватандалул цайва бивхьусса хъунмасса бурж биттур буллай жан дуллусса чувнал аьпа хъамакъабитулул ххуллийссар. Нитти-буттахьхьун Заннал ссавур дулуннав, махъминнал оьрмурдай барачат бишиннав!
Лакрал райондалул администрация


ДакIнийхтунусса кьурчIишиву кIидачIлай, жижара буллай буру Украиннавусса спецоперациялий жан харж дурсса, Хъусращиял шяравасса
Багьауттиннул арс Гъазиев Аликлул
нитти-буттахь, ниттирссу Зулайхат Тахакьаевахь, махъсса цинявгу гъан-маччацириннахь, Хъусращиял щалвагу жяматрахь. Лакку билаят уттигу ца язисса арснацIа, гьайбат дусса, оьвхъусса, ххаллилсса жагьилнацIа хьунни. Вирттал литIайхтугу, цIарду личIай. ЛичIантIиссар ваналмур цIагу Украиннал аьрщи неонацистътурацIа марцI дуллай жанну кьурван дурсса къучагътуравух. Цув алжаннул ххари аннав, рухI хъинний дишиннав! Ва кьурчIишиву духIансса ссавур нитти-буттахьхьун, ичIувацириннахьхьун ва гъанцириннахьхьун Аллагьнал дулуннав! Зул агьулданий ва махъра-махъмур кьурчIишиву хьуннав.
М. Илиясовал цIанийсса «Дараччи» фонд


ДакIнийхтунусса жижара буллай буру жула даврил уртакь Зулайхат Тахакьаевахь, ванил ссил арс
Алик
жагьилсса оьрмулий жандалуцIа шаврийн бувну. Цал бунагьир­ттал аьпа баннав, рухI бигьаний дишиннав!
«Илчилул» редакция