Ларгсса нюжмардий ДР-лул ХIукуматрал Председательнал цалчинма хъиривчу Батир Эмеевлул Инстаграмравусса цалла лажиндарай тIайланнасса дахIаврий дагъусттанлувтурал суаллахьхьунсса жавабру дуллунни.
Ванахьхьун буллалисса суаллурив бия щин дакъашиврия бусласисса, жагьилсса кулпатирттан булун ккаккан бувсса къаша-къушлия цIухлахисса, чIявусса оьрчIру бусса кулпатирттан къатри дансса аьрщарал хIакъираву цIухлахисса, республикалул АЗС-рдай газ, бензин ххира хьушивруцIун бавхIусса ва цаймигу.
Дагъусттаннай автозаправкардал заллухъруннал газ ххира баврил савав цири ва тари ва иширан къадагъа дишинтIисса суалданухьхьун жаваб дуллай, Батир Эмеевлул кIицI бувна, ва аралуву конкуренция ва низам дикIаншиврул, хIукуматрал пикри бушиву жулла республикалий щурущи дан федерал даражалийсса Лукойлданул ва Газпромрал заправкарду.
Жагьилсса кулпатирттал къатри ласуншиврул ци бан аьркинссар, тIисса суалданухьхьун жаваб дуллай, вице-премьернал бувсуна, кулпатрава ца МахIачкъалалив прописка дусса ухьурча, гьан аьркиншиву МахIачкъалаллал администрациялийн цивппа къатта аьркинсса жагьилсса кулпат бушиву тасттикь буллалисса аьрза чичин. Му аьрза чивчуну махъ ва хасъсса комиссиялул хъирив лавну махъ, жагьилсса кулпат «Обеспечение жильем молодых семей РД» тIисса программалувух гьуртту хъанахъишиврул сияхIрайн ласайссар.
