Проектрал кумаграйну агьали дузал бан най бур давурттал

Дагъусттаннал ЗахIматрал ва социал хьхьичIунмайшиврул министерствалул «Демография» нацпроектрал лагрулий давурттал щаллу бан най бур 1000-хъул инсан. Ххишаласса пишарду лахьхьин баву мурадрай «Содействие занятости» тIисса федерал проектрал лагрулий Республикалул ЗахIматрал министерство дачин дурну бур тамансса мероприятияртту.

Проектрал лагрулий пишарду лахьхьинсса ихтиярду дуссар давуртту дакъа ливчIсса, давурттал дузал байсса къуллугъирттайн аьрзарду буллуну бивкIсса, 50 шинал оьрмулува ливчусса инсантурахь, пенсиярттайн буккан чIун гъан хьу­сса, мюрщисса оьрчIащал ичIува щябивкIсса, школарттайн бачиннинсса оьрчIру бусса хъаннихь ва цаймигу категориярттал инсантурахь.
2021 шинал «Демография» нацпроектрал лагрулий пишарду лахьхьин булламиннал сияхI дур 1196 инсан, вайннава 897 инсан давурттал щаллу бувну бикIан аьркинссар.

Гьашину май зуруй, Республикалул ЗахIматрал министерствалул Аьрасатнал шяраваллил хозяйствалущал ва Аьра­сатнал ПрезидентначIасса паччахIлугърал къуллугъращал, Пишардал магьиршиву хьхьичIуннай даврил агентствалущал чирчуну дуссар пишарду лахьхьин буллансса кIулшивуртту дулаврил даву хIасул дансса кьутIи.
КьутIилул лагрулий ккаккан бувсса куццуй, агьалинаща уква лахьхьин бюхъайссар цIанасса чIумал тIалавшиннарду дусса пишарду.
Пишарду лахьхьин буллалисса кIулшивуртту дулаврил программартту дур кIира нюжмардия шанма зуруйн дияннинсса.

Шиккува кIицI лаган, ЗахI­матрал министерствалул ва Республикалул ХIукуматрал дянивсса кьутIилийн бувну, вай пишарду лахьлай бивкIминнава 75% инсантурал давурттал щаллу бан аьркинссар.
ЦIанасса ппурттуву агьали давурттал дузал байсса къуллугърал зузалт бур жучIава яла тIалавну буми пишарду ххал бигьлай.