[dropcap]И[/dropcap]юньдалул 27-нния 30-ннийн дияннин МахIачкъалалив «Культура» проектрал лагрулий най дия халкьуннал творчествалул регионнал дянив­сса «Обряды и традиции Ро­ссии» цIанилусса фестиваль. Ва сакин дурну дия Аьрасатнал Культуралул фондрал, Аьрасатнал Федерациялул Культуралул министерствалул, Республикалул Халкьуннал творчествалул къатлул, «Центр содействия в реализации социально-культурных и благотворительных проектов «Дом будущего» АНО-рал.

Республикалий хIасул хьусса санитар-эпидемиологиялул къулай дакъасса тагьаргу хIи­савравун ларсун, фестиваль хьунни тамашачитал бакъанува, онлайн кьаралданий, Роспотребнадзорданул тIалавшиннардугу биттур дурну.

[dropcap]Ф[/dropcap]естивальданул лагрулий хьунни фольклорданул коллективирттал «Ттул ирс» цIанилусса концерт, Ухссавнил Ккавкказуллал халкьуннал хъатIул аьда­тирттал «Реконструкция-представление», халкьуннал костюмрал «Аьдатру ва ттизамана» тIисса выставка, «Аьрасатнал халкьуннал культуралул ирс» тIисса ккуркки стол, ашугтурал ва халкьуннал балайрду щаллу буллалиминнал «ДакIнил синтту» тIисса байран, «Аьрасатнал аьдатру» тIисса фольклорданул байран ва пагьламантурал байран.

[dropcap]Ф[/dropcap]естивальданий гьур­тту хьунни Дагъусттанная­сса, Ингушетиянавасса, Къа­рачай-Чаргаснавасса, Къа­бардин-Балкьарнавасса, Ух­ссавнил АьсатIиннавасса-Аланиянавасса, Чачаннавасса ва Ставрополлал крайраясса творчествалул коллективру, балайчитал ва усттартал.

Дагъусттаннал 15 райондалиясса ва шагьрурдаясса коллективирттавух фестивальданий гьуртту хьунни Ккуллал райондалиясса Хъусращиял шяраваллил халкьуннал театргу. Ва театрданул репертуардануву хъунмур кIану бугьлай бур буттахъая ирсирай жуйнна дирсса аьдатру-эбадатру ядаврийн дагьайсса даврил.
– Фестивальданий жу кка­ккан буварду зунттал агьалинал, захIмат-жапасса оьрмулиясса постановка. Гьуртту хъанай уссия 12 инсан, цивппагу хьхьичIарасса лаххи-ликкиялуву. Махъсса шиннардий гьаз хьуну нанисса масъалану бур хъами-душру жулла диндалул тIалавшиннардайн бувну янна лахлахаврицIун бавхIумур. Жула постановкалувугу жу ккаккан буллай буру хьхьичIвагу жула ниттил ниттихъул чурххал базурду, кIиз, хаятIив чIалай занай къабивкIшиву, амма хъиннува лухIулувун лавгунгу къабивкIшиву, бакIвахIурттугу дархIуну, ялтту лачакругу дирчуну занай бивкIшиву.

ЦIанасса, цаннияр ца ххуйсса карщив дусса, чIумал бюхълай бушиву хъиннува ххуйну, авурну лахлан диндалул ккаккан буллалисса куццуй. Укунсса фестиваллу чара бакъа аьркинссар кувннал культуралия, аьдат-эбадатирттая кувннан кIулну бикIаншиврул, даврил опыт кувннащал кув кIибачIланшиврул, сценалий цайминнал ласласисса шаттирах, актернал тIуркIулух бурганшиврул, цайми миллатирттал балайрду, къавтIавуртту, хъатIул аьдатру ккакканшиврул. Хъунмасса барчаллагь ва фестивальданул сиптачитурайн, укунсса даврихлу, ваний гьуртту хьунсса, жуннанияр даву ххуйну кIулсса, му канилух дурксса цайми коллективирттах бургансса каши жухьхьунна дулаврихлу, миннащал ца сахIналий бацIан жуйнмагу оьвкуну тIий. Хъунмасса барчаллагь, фестивальданийн бачинсса транспортралсса тIий, цамунилсса тIий бувсса, райондалул магьирлугърал отделданул хъунмур Марина Ибрагьимовайн.

[dropcap]Ж[/dropcap]ул коллективраву ялагу хъуннасса къулагъас дуссар лакку маз ябаврих, му ххуллий, хьхьичIавасса махъру ишла буллай, жулва буттахъул гъалгъа тIий бивкIсса, мискинссар тIурчагу, хъинну авадансса мазрай гъалгъа тIий, хIарачат буллай буру цайминнавунгу мунихсса ччаву, му лахьхьаврихсса зуву рутан, – тIий буслай ур Хъусращиял шяраваллил Халкьуннал театрданул режиссер Марсель Сулайманов.