Ларгмур нюжмардий Къиримнаву ва Сочилий ларчIсса чявхъа гъараллал биян бувсса зараллаясса ва бала-апатIирттаясса хавардах вичIидихьлахьийни, барз ва ххишалагу гъарал кIунтI къабагьсса МахIачкъалалив жувува нажагьсса акъа-акъахьунссия: «Аман, жунгу хьурдай ххюра минутIрайссарагу, ххитвагу шюшинсса гъарал!» – тIий, Аллагьнайн лакъаивзсса. Амма дурая жула хъуншагьрулул ссавруннай ттурлу дацIан. Няй-няй тIий бивтсса бургъил кIиришиву духIан къабигьархха укуннагу щюллишиву, мурхьру чансса МахIачкъалалив. Хьуна гьантри ххютулу 36-37 градус кIиришиврийн лархъссагу.

---

ХIасил, цукссара хIура ду­ккан хIадур хъанай диркIссарив ссав, ва ларгсса арвахIкьини МахIачкъалалив хьунни, аьдатрайн бувну, щинаву гьузузи­сса ва цIаннавун бахьлавгсса. ТIюпан байбивхьусса цалчинми минутIирттайва бачIи ххишалагу шагьрулий чани левщун, светофорду къазий ва кучардайх­сса щинал нехру савав хьунни лахъисса манзиллайхсса машинарттал «чIутIру» хьун. Машинартту гьузуй бия Ахъушинскийл кучалийгу, Редукторныйлийгу, Анжи-базаллучIасса ламул лувгу. МЧС-рал гьан дур­сса смс-кардайн бувну, гужсса гъаралданущалсса марч бия 15-18 м/с. Ахттакьунбизулуву дайдирхьусса гъарал сававну, давурттая бувксса халкь ссятурдий шаппайн биян къахъанай, социал сетирдаву чичлай булувкьуну бия.

Цаппара хIаллава социал сетирдавух ппив хьуна халкь, кучардайсса мугьалтту лахъан къавхьуну, кув щинаву гьузузисса, кув щинал лавсун нани­сса видеорттугу. Хъунисса зараллу хьуну бур щинавун лавгсса кучардайсса ттучаннал, автостоянкарттал ва кафердал заллухъруннангу. Дайгьин-дугьан къархьуну, чапалсса щинну дурххун, миннал хъус зия хьусса ишру чIявусса хьуну бур. ТтукI левщун, хъиривмур кьинигу ттукI къабуллусса мюрщи ттучаннаву дуки-хIачIия зия хьуссагу чан­сса бакъар.

Ва бала-апатIраву Ма­хIач­къалаллал бакI дургьуми бувагу цичIав зий бакъая учавугу къатIайлари. Щинал гьузузи­сса кучарду, лахъи лаган къабивтун, «ливневкарду» марцI дурну, ччясса мутталий тархъан бунни. Зий бур ми хIакьинугу. Зий бур «Дагэнерголул» зузалтгу. Хилкьа дурксса, духсса ва дияйнийн дирсса МахIачкъалаллал ттукIрал ххаллацIун, щинал бургъурдацIун ва тIавтIсса ххуллурдацIун утти жуннасса нигь-ццаххаххинна хьунуккар интту-гъинттулсса чявхъа гъаралгу, ссут-кIинттул – гьар шинах, «цакуну» байсса марххалагу.
Чявхъа гъараллу ва кьини ларчIун дур, ца хъуншагьрулий дакъа, жулла цаппара районнайгу. Гужсса гъараллал зараллу биян бувну бур Хасавюртуллал, УнцIукIуллал, Гумбетуллал, Бабаюртуллал ва Къумтуркъалаллал районнайсса агьалинангу. Кув кIанттурдай лахIунтту дурккун, ххуллурду левкьун, кув кIанттурдай нехру дурккун, кув кIанттурдай агьалинал машинартту щинал лавсун бур. ЦIана миккугу, щархъаву чанирду левщун, щурущи дурну дусса дур ттукIрал давуртту.

МахIачкъалаллал каялувчитурал баян баврийну, шагьрулул кучардай ттукI лахъаврил давуртту найнна дия хамискьинигу.
Амма цуппа шагьрулун, агьалинан зараллу хьурчагу, ххуй­сса рахIмат хьунни тIабиаьтран. Бувгьуну махъ щин рутIин хъамабитайсса хъуншагьрулул кучардайсса ссуссукьусса мурхьирдан ва къатIран ххуй­сса атилшиву хьунни ца чулуха. ТIабиаьтрайсса аьй дакъархха, гъарал-марххала сававну ша­сса зараллу МахIачкъалалив жула биччибакъулшиву сававну шайшиву.
Гъинтнил гъарал дарсну хьунхьуви шагьрулул бакI дургьуминнан ссут-кIинттулнинсса хIадуршинна дайни.