Дуккаврил идарарттай чIяву хъанай бур коронавирусрал къашавайми

ДР-лул КIулшиву дулаврил ва элмулул министерствалул эпидемиологиялул тагьарданул ялув дуллалисса мониторинграл ккаккан бувну бур ва азар дирми чIяву хъанай бушиву гьантлия гьантлийн.

2021 шинал июль зурул 7-ннийн республикалул кIул­шиву дулаврил идарарттал зузалтрал дянив COVID -19 азарданул къашавай хьуну ур 160 инсан.
Къашавай хъанахъими гьарза хъанай бур ДР-лул муниципал органнал кIулшиву дулаврил идарарттал зузалтрал дянивгу.
Махъсса кьини къашавай хьуну ур 14 инсан (Шамиллул райондалий – 4, ЦIунтIиннал райондалий – 2, Къарабудахккантуллал райондалий – 1, Къаяккантуллал райондалий – 1, Хасавюртлив – 1, ЦОДОУ ЗОЖ – 4).

Муниципал органнал кIулшиву дулаврил идарар­ттал 1131 зузалал дянив вакцина бувну бур 553 зузалал, 155 зузалан ккаккан бувну бур къабан бучIину.
КIулшиву дулаврил идарарттал дянив, цIусса коронавирусрал инфекция ппив хьун къаритаву мурадрай, гужлан дурну дур ссуссукьушиннардая ва вакцина баврил мюнпатрая бусласисса даву.
ДР-лул КIулшиву дулаврил ва элмулул министерствалул зузалтрава (71 инсан) вакцина бувну бур 48 зузалал. ЛивчIсса 25 зузалаву цавайннал антителарду ляркъуну дур, цавайннангу къабучIину ккаккан бувну бур му бан.