Хачилаевлул аьпалун

МахIаммад Хачилаевлул Аьпалул кубок

[dropcap]В[/dropcap]ай гьантрай Каспийскалий, Аьли Аьлиевлул цIанийсса спортрал чIалъаьлуву, хьунни «МахIаммад Хачилаевлул цIа абад даврил Кубок» тIисса Аьрасатнал каратэлул бяст-ччаллу.
Турнирданий гьуртту хьунни Ухссавнил АьсатIиннал, Къабардин- Балкьарнал, Чачаннал, Къарачай-Чаргаснал, Краснодардал, Ашттарханнал, Ростовуллал, Пензаллал, Оренбургуллал, Воронежуллал, Саратовуллал улкраясса ва Дагъусттаннал спортсментал. Медаллайн тамахI бивхьусса бия чIава жагьилталгу, бугьарамигу.
Дагъусттаннал каратистътурал ларсунни 40-нния лирчу­сса медаллу, миннувату 14 дур мусил, 10 – арцул ва 17 – чарвитул.

Чарвитул медаль
Дагъусттаннаясса душ Мариян ХIусайновал ларсунни чарвитул медаль лачIун буккаврил Европанал первенстволий. Турнир хьуссар 21 шинавун бияннинсса душварал дянив Германиянаву. ЛачIунбуккул тренер Эмма МахIаммадовал тIимунийну, Мариян ХIусайнова цалчин гьуртту хьуну бур дунияллул халкьуннал дянивсса бяст-ччаллавух, мунияту Дагъусттаннал лачIунбуккул хьун дурсса хIасил лайкьсса даражалун ккаллину дур. Шамилчинмур кIанттул цIаний Мариян лачIун бувккун бур Польшанал спортсмен душнищал ва ххув хьуну бур 6:0 счетращал .

Европанал кубокрай
Дагъусттаннал дзюдоист ИбрагьимхIажи Сулаймановлул 3-мур кIану бувгьунни Европанал кубокрай. Дзюдорал кубокрал цIанийсса бяст-ччаллу хьунни июльданул 3-4 нний Португалиянаву. 81 килорал кIушиврий ххув хьунни Сулаймановлул муттаэ, Ставрополлал улклуясса Даниил Драновский.

Европанал первенстволий
[dropcap]Б[/dropcap]уйнакскалиясса Динислам Бамматовлул арцул медаль ларсунни Германиянаву хьусса греко-римуллал журалийсса лачIун буккаврил Европанал первенстволий. Аьрасатнал цачIундур командалуву Бамматов уклай ивкIссар 60 килорал кIушиврий. Бяст-ччаллал ахирданий мусил медальданул цIанийсса лачIун уккавриву дагъусттанлув ух хьуну ур Гуржиял вакил Придон Абуладзеяр.