Июль зурул 7- нний Москавлив, Миллатирттал къатлуву, Москавливсса «Дагъусттан» Культуралул центрданул сипталийну, ккаккан дунни «Цалчинсса къала» тIисса документал журалул киносурат.
Ва киносуратрал съёмкартту МахIачкъалаллал №1-мур шагьрулул азарханалий дурссар. Фильмрал продюсер, азарханалул хъунама хIакиннал, ХIажимурад Малаевлул, кумагчи Исрапил Исрапиловлул тIийкун, «Редукторныйлийсса цалчинсса азархана хьуссар ковидрал къашавайминнансса цалчинсса къалану». Иттав макь дучIан дуллалисса лахIзардая, медициналул зузалтрал чувшиврия бия та кьини презентациялийсса ихтилатру. Гьаннайсса, интту Дагъусттаннал азарханардай хъанай бивкIмур хIакьну ккаккан буллалисса, мусиватсса азарданул сичча аьчну цIитI дикIан дуллалисса ва мунищалсса талатаврил тарг ккаккан буллалисса.
Москавуллал культуралул центрданул вице-президент , Сеченовлул цIанийсса ПМГМУ-рал профессор Астемир Щайхаьлиевлул, «Дагъусттан» МЦК-лул медиктурал ассоциациялул хъунмур, психологиялул элмурдал кандидат Гулизар Башанаевал, Дагъусттаннал поспредстволул культуралул масъалартталсса буллалисса Жяматийсса советрал хъунмур ПатIимат ХIаммадовал ва цинявгу ихтилатру буллалиминнал чIурчIав дурна, коронавирусрал азар къизгъинсса ппурттуву дагъусттаннал медициналул зузалт, баласса азарданул ххяппурттаща агьали ххассал буллай, кьянкьану бавцIуну бивкIшиву, барчаллагь ва хIурмат хIалал буванну чувшиврий зий бивкIшиву ва уттигу мува яхIлий зий бушиву. Ва презентациялул даврил хъар цийнна ларсъсса Культуралул центрданул президиумрал член СалихIат Валиевал барчаллагь увкуна гьуртту хьун бувкIцириннахь ва мероприятие лайкьсса даражалий щаллу даншиврул чIарав бавцIусса волонтёртурахь, Сеченовлул институтраву дуклакисса Дагъусттаннал жагьилтурахь. Цуксса дюххансса, тамашачитурал дакIурдин асар хьунсса киносурат духьурчагу, «Цалчинсса къала» личIаннав так лавгмунивасса «цалчинсса къалану».
