ЦIу лещан дан вардиш хъанай

Дарбантуллал ва Избербашуллал вневедомственный къаралданул отделлал зузалтрал региондалул МЧС-ращал архIал дунни цIарая мюхчан шаврицIунсса лахьхьинбавуртту (ученияртту).

Учениярттайн бувну, вневедомственный къаралданул къатраву ларчIун дур цIу. Зузалтран багьлай бур, цIу лещан дай къуллугърал зузалт бучIаннин, инсантал ва багьлул ххирасса хъус къатрава дуккан дан.

Шиккува Росгвардиялул зузалтрал ккаккан буллай бур цIу лещан дайсса ярагъ ишла бай­сса куц. Дагъусттаннал Росгвардиялул управлениялул цIарая мюхчан шаврил инспекциялул хъунама капитан Марат Мамедьяровлул кIицI лавгунни учениярттал мурад бушиву дежурный къуллугъ ва пожарный расчет цIу ларчIсса чIумал занакьулу бикIан вардиш шаву.

Ми лахьхьинбавурттал лаг­рулий мукунна хьунни угарный газрал загьрулул бувсса ва ччувччусса инсантуран цалчин­сса медициналул кумаг баврил занятиярттугу.
Зузалтрал ккаккан бунни цала бюхъу-хъит ва пишакаршиврул даража.