Ларгсса нюжмардий РАН ДФИЦ-рал конференц-залдануву «Орнитопарк -Туралинская лагуна» тIисса тIабиаьтрал паркран хасъсса социал-экологиялул проектрал презентация хьунни. Ваний гьуртту хьунни, РАН ЛФИЦ-рал пишакартал, аьлимтал бакъасса, республикалул личIи-личIисса шагьрурдая ва районная бувкIсса общественниктал, журналистътал ва ДР-лул ТIабиаьтрал сурсатирттал ва экологиялул министерствалул вакилтал.

БатIаву тIитIлай, РАН ДФИЦ-рал председатель, РАН-рал член-корреспондент, аьлимчу Акай Муртазаевлул кIицI бувна, проектрал лагрулий ххал бигьлагьи­сса МахIачкъалаллал ва Каспийскаллал дянивсса ухссавнил билаятирттая кьиблалийсса билаятирттайн интту-ссуттил левххун нанисса лелуххантран ликказанну хьусса Туралиллал лагуна Каспий хьхьирицI хIасул хьушиву ХХ-мур ттуршукулул ахирданий, цакуну хьхьири гьазгу хьуну, махъунмай лавгсса тIабиаьтрал иш сававну. Ва кIану цIана Аьра­сатнаву ца яла хъуннасса лелуххантрал ликказандаран ккаллину бусса бур. Ликказандарая хьуну бусса бур ущу-щулгъилул, лелуххантрал, мюрщи жанавартрал ва уртту-щинал авадансса тIабиаьтрал парк. Шикку лахъисса манзилданийх левххун нанисса 5 азарваксса лелуххи щябикIайсса-леххайсса бур кьинилун.

«Жулла республикалул хъуншагьрулий, шиная шинайн тIий бухлаглай, бувагу ливчIун бакъар экологиялул туризм щурущи дансса кIану. Жула аьлимтурал ххал диргьусса ва проектрал лагрулий шикку бюхъанссия аэропортрайн нанимигу, аэропортрая нанимигу хъамалу буцинсса, дакI рахIатну шагьрурдал аьлагъужалия бигьалагансса кIану буван», – увкуна РАН ДФИЦ-рал председательнал. Лелуххантрал элму ххалдигьлагьисса аьлимтурал-орнитологтурал тIимунийн бувну, проектрал мурад бур тIабиаьтрал цайнува цуппа хIасул хьусса, ухссавния кьиблалийн ягу кьиблалия ухссавнийн левххун нани­сса лелуххантрал язи бувгьусса ва мурцIу ябансса ва буруччинсса чаранну лякъияра тIисса тавакъюращал республикалул каялувшиндарайн буккансса.
Проектрал заллу, биологиялул элмурдал кандидат, РАН ДФИЦ-рал биологиялул сурсатирттал институтрал элмулул хьхьич1унсса пишакар Евгений Вилковлулгу бувсуна гьарта-гьарзану Туралиллал лагуналия ва цурда проектрая. Ванал бусаврийну, гьарца шинах, лагуналий ликказангу дурну, интту-ссуттил ухссавнил билаятирттая кьиблалийн ягу махъунмай шичча леххайсса бур 299-сса журалул 12 миллиондалийн бивсса лелуххант.

«Жул мурад бур ва кIану мюхчан баншиврул, чIал къавхьуну лагма-ялтту къатри дуллай су­кку къахьун, лагуна дуруччинсса хасъсса статус бансса тавакъюращал хъуниминнайнгу бувккун, шикку халкь бацIансса ва лелуххантрай тамаша буллансса майданну бувну, шиччалу туристътуралмур къулагъасралун ласунсса. Ва цуппагу гьан-бучIан бигьасса, арх бакъа санаторияртту ва пляжру бу­сса, къулайсса кIану бур. ХIасил, тIабиаьтгу дуруччин бюхъанссия, республикалул хазналувун маэшатгу хъананссия», – увкуна Евгений Вилковлул.
Ахирданий общественниктуралгу ва проектрал хIакъираву махъру лавхъун махъ, батIаврий пикри хьуна, резолюция кьамул дурну, республикалул каялувчитуран Туралиллал лагуна дуруччин аьркиншиврия баян бан.