Гьантлул хъирив гьантта най бур: шамилчинмур, мяйлчинмур, мукьцIалчинмур, ххюцIаллий кIилчинмур, шингу ялун диянтIиссар АхIмад Хасаев дунияллий акъа. Хьунабакьару гъан-маччацири, дакIнийн утлай буру, хIайп тIий буру, къумашиву аьч дуллай буру. Цивхьуссар мунийну? Дард куклу хъанай дакъархха. АхIмад Щайхович лавгунни, занагу къаикIанссар. Акъассар…

Медициналул институтрал ца яла азгъунмур ттарцI дагьунни: махIрум хьунни ца яла язима аьлимчунацIа, студентътуран дазу дакъа ххирасса, ххаллил­сса педагогнацIа, преподавательтал – дакI-аьмал хъинсса, давугу, элмугу куртIну кIулсса даврил уртакьнацIа, медициналул зузалт – опыт бусса, даврил мухIлу-хIин ххуйну кIулсса минахурнацIа. Цури утти студентътуран курсовойрду ва дипломру чичин кумаг буван чялиш уккавантIисса? Цури аспирантътуран хъиривлаявурттаву кумаг буван, АхIмад Щайхович куна, анавар уккавантIисса? Цури даврил уртакьтуран дакIнийхтунусса маслихIат буван, цIуцIи шанийн багьминнаха дакI цIуцIисса аякьа дуван, ва куна, хъит тIунтIисса? Цури зунтту хьуну чIарав ацIа­вантIисса?
Вин тIабиаьтралла узданшиву дуллуну дия, къуццу тIийгу ияв адаврай, гьарца ша кIуну, алвагьну бизлай, вилва миллатраха, Дагъусттаннал агьалинаха хIакьну къуллугъ буллай. Вил куннасса хасиятру думиннайн патриотътал, вирттал тIун бикIай. Цаймигу ларайсса цIарду дизлан бикIай. Дулайхха ларайсса наградартту, хIатта Виричунал цIагума, тарихрал лагрулий личIину ккалли дансса да­къахьурчагу, чIири-хъунсса, итталун дагьансса чувшиву дурминнангума. Вил щалвагу оьрмулул гьарца кьини тIурча, чувшиврул ххуллийсса дия. Гьар кьини ина, уххаву къакIулну, инсантурал оьрмурдал, цIуллушиврул къаралданий авцIуну ияв цIакьну, хIакьсса аьскар куна. Гьарца кьини, чувшиврул ххуллу-ххуттая хIура къавхьуну, инсантал цIуцIавурттал ххяппурттаща зехлай, ххассал буллай ияв. Щил дуванссар ина ххассал бувцири оьрмурдал ккал? Цуксса ла­хъисса хьунссар му сияхI. Гьай-гьай, ина наградарттал цIаний акъаяв ххассал буллалиссагу. Вила дакIнил тIалавшиндарайн бувнуяв, инсантурахсса ччаврилъяв. Инсаннал чIарав авцIуну, вищава шайсса кумаг баву вила буржну ккаклаки­сса уну тIийяв. Ца мукъуйну учиннив, инсаншиву ххисса уну тIий.
Хьумур хьунни, азарийла хIайп учирчагу, лавгунна ина. Амма ина агьалинал дакIурдиву кьадиртсса аьш цIакьну, куртIну ва яргну личIантIиссар. Лекъакьай къалалул ххуллийсса давуртту личIантIиссар.
Ина кьабивтунни кьиматрай­сса ирс-ххазина: ина ура хъуни-хъунисса хъиривлаявуртту медициналул элмулуву дурсса ва ми давриву мюнпатну бартдиргьусса цIанихсса аьлимчу-хIакин, студентътуран ва коллегахъан чIалачIин дакъая виха. Шяраваллил агьулдания тIайла хьуну, щалвагу Аьрасатнал лагрулий вил цIанил хIурмат лавайсса бия, хIатта вил цIа дургьуну цайми регионнаягума бучIайва хъин хьун.
Ина лакрал миллатрал тарихраву яла яргсса ххуттай цIа личIанну оьрму бувтсса инсанна.
Вил ххаллилсса кулпат бур: дакIнилгу, оьрмулулгу дус, агьам­сса давурттал «соавтор», аьчухсса ва ненттабакI тIивтIусса Зайнаб, ххаллилсса арс Аьбдурашид ва душнил кIанттайсса арсналщар Гульшан, миннал наслулул ххаллилсса кацI, вила цIа дирзсса арснал арс АхIмадгу хIалану. Вай ина цIакьсса ва куртIсса гьанурду бивзсса, ина тарбия дуллусса вил ххазинасса агьлу-авладри. Вил цIа адаврай, лайкьну дуруччинсса наслур.
АхIмад ЩайхмахIаммадович, ххирасса АхIмад! Ттунгу дакI­нийх­туну ххираяв ина. На хIайранну икIайссияв ва уссара гьармуниву итххявхсса вил хасият ххуйшиврий, бюхъу-гьунар бусса, инсаншиву дусса ушиврий. Ххарину ура жува мачча хьуну тIийгу, ва дуллу дунияллий жула ужагърайн яла ххуймур арснал щар (вил арснал душ) бучIаврихлунугу. Гьай-гьай, аьсивнугу ура ина дунияллия лавгун тIий. Амма дакIурдива къалагаймара!

АьбдурахIман Халилов