«Магнит» сетьрал цалчинсса ттучанну

«Магнит» сетьрал цалчинсса ттучанну

Ларгсса нюжмардий жулла республикалий тIивтIунни «Магнит» тIисса хъуни ттучаннал сетьрал супермаркетру. «У дома» ва «Магнит- Косметик» тIисса цалчинсса ттучанну жучIава тIивтIунни Каспийскалий «Анжи-Ареналул» тия чулий. Аьрасатнаву Дагъусттан утти хъанахъиссар 67-сса субъект ва ттучаннал сетьрал цала ттучанну тIитIин язи бувгьусса.

Ттучанну тIитIлатIисса шадлугърай гьуртту хьунни ДР-лул БакIчинал буржру чIумуйну биттур буллалисса Сергей Меликов, ДР-лул ХIукуматрал Председатель АьбдулпаттахI Амирханов, «Магнит» хъуни ттучаннал сетьрал гендиректор Ян Дюннинг ва Москавлия видеоконференциялул кумаграйну АьФ-лул промышленностьрал ва машлул министр Денис Мантуровгу.
Шадлугърайн бавтIминнахь аьлам-ссаламгу бувну, Денис Мантуровлул кIицI лавгунни Дагъусттаннал экономикалувун увкIшиву хъунмасса маэшатрал ва машлул вакил ва ххи бунни билаятрай «Магнит» сий дусса ва бусравсса бизнесран ккаллину бушиву.

«Ттун кIулли Дагъусттаннай машгьурну душиву мюршсса машлул дахIавуртту, кIулли да­гъусттанлувтуран маша бан ххирашиву базардаву, ярмукIардай ва мюрщи ттучаннай. КIулли республикалийн хъуни ттучаннал сеть дуркIшиврия къарязисса бушивугу. Амма «Магнитрал» мурад кIанттул бизнес къума-цIан дуллансса ва ссуссукьу дуллансса бакъашиву гихунмай чIалантIиссар. Мунил мурадну хъанахъиссар кIанттул дуки-хIачIиялул арагу лябукку буну щурущи дурну, хIал-ахIвал кIюламиннахсса аякьалул лагрулийсса багьри лагь буллантIисса акциярдугу щурущи дуллансса», – увкунни Мантуровлул.
Сергей Меликовлул цала чулуха ххи бунни Дагъусттаннай итадакьлакьисса дуки-хIачIия экологиялул марцIсса, инсаннал чурххан бузсса ва шиная шинайн чIярусса регионнай бусрав хъанахъисса душиву.

– Дагъусттаннайн «Магнит» ттучанну бучIан баврил агьаммур мурадну хъанахъиссар жула шяраваллил хъус дуккан дуллалисса производительтурахсса аякьа даву. Жун ччай бур миннал хъус гьар кIанай тIалавну ва миннал цIа дуккан дан, – увкунни ДР-лул БакIчинал.
АьбдулпаттахI Амирхановлулгу цала мукъуву кIицI бунни Дагъусттаннай «Магнит» тIитIаврил ца багьана жула ­яттил дикI душиву. Ян Дюнниглул цала чулуха ххи бунни Дагъусттанная­сса дикI билаятрал чIявусса регионнай качествалул ххуйссаннун ва тIалавссаннун ккаллину душиву. Мукунма ванал бувсунни ва шинал ахирданийннин Дагъус­ттаннай тIитIинтIишиву 20 супермаркет. Шанна шинал дянив республикалий вайннал тIитIинтIий бур 2000-ксса инсаннан зузи кIанттурду хьунтIисса 200 ттучан.
«Магнит» ттучаннал сетьрал хъуниминнал икьрал дурну дур жулла республикалийсса 23 производительнащал гайннал дуки-хIачIия дахлан вай ттучаннаву.
Супермаркетрал хьхьичI ятIул лиссу кьуркьуну махъ, жулла республикалийсса «Магнитрал» хъунама директор Руслан Исмяиловлул шадлугърал гьурттучитуран ккаккан бувунни ттучанну ва гиву дахлахисса хъус.

«Магнит-Косметик» ттучандалуву дахлантIиссар 7 500 цIанилусса химиялул, косметикалул ва парфюмериялул хъус.
Дуки-хIачIиялулмур «Магнитраву» дахлантIиссар жулла дикIул, накIлил, ччатI-мака­роннал продукция. Бахлан­тIиссар жула турт, ницI ва нацIу-кьацIурду. Вай ттучаннаву чIун-чIумуй дуллантIиссар багьрацIун дархIусса акциярдугу. Итникьинилия нюжмаркьининийн ттучандалувун бувкIсса пенсионертуран дикIантIиссар 10% скидкагу.

Читайте также: