Зунттал халкьуннал аьдатирттал фестиваль

Дагъусттаннай июньдалул 28-нний дайдирхьунни, июльданул 5-ннин най дикIантIисса, фольклорданул ва аслийсса культуралул Дунияллул халкьуннал дянивсса ХIХ «Горцы» фестиваль. Ва дуллалиссар 2004-ку шинная шийннай, 2012-ку шинная шийннай тIурча – ЮНЕСКО-лул эгидалулу. Ларгсса шинал фестиваль тарихраву хьхьичIра-хьхьичI хьуссар тамашачитал бакъа, онлайн кьаралданий. Гьашинумургу, мукунна, санитар-эпидемиологиялул къулай дакъасса тагьар сававну.


Фестивальданул дайдихьу дуллай, муний гьуртту хьун республикалийн Аьрасатнал регионная ва чил билаятирттая бувкIсса коллективру бавчуна балайрдащал ва къавтIавурттащал. Гихуннай хьунни «Ттул Аьрасат – ттул Дагъусттан» тIисса цIанилусса гала-концерт. Му дачин дурминнал дурккуна фестивальданул цIаний дуркIсса барча буллалисса телеграммарду: Аьра­сатнал Федерациялул культуралул министр Ольга Любимовал, ЮНЕСКО-лул иширтталсса бувайсса Аьрасатнал Федерациялул Комиссиялул Жаваблувсса секретарь Григорий Орджоникидзел, Аьрасатнал Федерациялул Президентнал маслихIатчи, ПрезидентначIасса Культуралул ва искусствалул советрал секретарь Владимир Толстойл, Аьрасатнал ПаччахIлугърал Поленовлул цIанийсса Халкьуннал творчествалул къатлул директор Тамара Пуртовал цIардаясса телеграммарду.

Гихуннай халкьуннал творчествалул яргсса байрандалий гьурттушинна дурна Мексиканавасса, Азирбижаннавасса, Беларусьнавасса, Донецкаллал Халкьуннал Республикалиясса, Луганскаллал Халкьуннал Республикалиясса, Марий Эл Республикалиясса, Владимирдал, Волгоградуллал, Вологодуллал, Оренбургуллал, Ярославуллал, Псковскаллал областирдаясса, Чачаннавасса коллективирттал. Жулла республикалул коллективирдавух фестивальданул цалчинмур кьинилул шадлугърай гьуртту хьуна Ккуллал райондалиямургу. Ва хьуна халкьуннал искусствалул мяйжаннугусса байран, яргсса, авадансса.
Фестивальданул лагрулий хьуна халкьуннал канил пишардал выставкагу: тIахIунтту даврил, авторсса ссихьу даврил ва м.ц.

«Горцы» фестиваль дуллалиссар Аьрасатнал культуралул министерствалул, В.Д. Поленовлул цIанийсса Аьрасатнал паччахIлугърал Халкьуннал творчествалул къатлул, Дагъус­ттан Республикалул Культуралул министерствалул, Республикалул Халкьуннал творчествалул къатлул, МахIачкъала шагьрулул администрациялул, ЮНЕСКО-лул иширтталсса бувайсса Аьра­сатнал Комиссиялул Дагъусттаннал отделениялучIасса материал дакъасса культуралул ирсирал Комитетрал чIарав бацIаврийну. Фестивальданул лагрулий вай гьантрай хьунни ва хъанай дур чIярусса шадлугъру. Вайннувасса цанугу хьунни «Маскардал фестиваль» проект.

Ванил агьаммур мурад бур культуралул аьдатирттал аваданшиву ккаккан даву, миннувух – личIи-личIисса аьдатру щаллу дуллайна ишла дувайсса маскардугу. ХьхьичIра маскарду чIяруну ишла дувайсса диркIссар ххуй­сса бакIлахъру дучIан даву, аьрщи буллугъсса шаву ва мукунма цаймигу ишру щаллу шаву мурадрай дуллай бивкIсса давурттаву. Масалдаран, жучIара, лакрачIа, маскарду ца-царай шяраваллал ишла дувай Цалчинсса хъарас щилащисса байрандалий. ХъунмурчIиннив маскардал бияла ларгсса чIумуву ливчIун бур ва цIана ми оьрчIал ва жагьилтурал ишла дуллай бур хIазиран, тяхъашиврун.

Маскардал фестивальданий гьуртту хьунни ЦIуссалакрал райондалиясса М. Чариновлул цIанийсса халкьуннал театр, Къаяккантуллал ва Табасараннал районнаясса театрду. Вайннал ккаккан дурна Интнилхьхьунил ва Цалчинсса хъарасрал байраннал аьдатру. Мукунма гьуртту хьуна «Непоседы» цIанилусса ОьрчIал театрал студиялул коллектив, Дагъусттаннал ссихьрал театр.
ХьхьичIунсса гьурттучитуравух бия ЦIуссалакрал райондалиясса «Эдельвейс» тIисса Мурад Сулаймановлул каялувшиндаралусса къавтIаврил ансамбльданувасса 11 шинаву­сса Аида Зайпуллаевагу. Ванил щаллу дуруна лакрал халкьуннал къавтIаву.