Гьарца ялату нанисса шинащал арх хъанай дур Бюхттулсса Ххувшавриясса хавар бавсса кьини, мунищала ялавай багьлай бакъар му кьинилул кьадру, бусрав. ТачIаввагу хъамабитлай бакъар ва чаннасса кьини хьунадакьин нясивну къалявкъусса, шаппай цалва кулпатирттачIан, мюрщисса оьрчIачIан зана къавхьуну, ва кьини гъан дуллай цалла жагьилсса жанну аьрали майданнай кьариртми вирттал. Мукунминнавасса бур ГьунчIукьатIрал шяравасса ХIасанов Нуруттин ва Мурадов Бадави.
ХIасанов Нуруттин увну ур ГьунчIукьатIрал шяраву 1905-ку шинал ХIасан-ХIусайннул ва Салиматлул кулпатраву. Нуруттин чIивину унува диркIуну дур вайннал нину, цилва мюрщими кIия уссилсса, Нуруттиннулсса ва МахIаммадлулсса, ва ссилсса, Написатлулсса, буллан багьну бур 12 шинавусса Ххадижатлун.
Нуруттиннул бутта къалайчи ивкIун ур, мунал цалва дуссукъатта бивкIун бур. ХIасан-ХIусайннул цалва оьрчIангу лахьхьин дурну дур му касму. Цалла касмулий зун, дяъви байбишиннинма Омск шагьрулийн лавгун бур вай. Мукун, Нуруттингу Омскаллал шагьрулул военкоматрал тихава увцуну ур дяъвилийн. Нуруттин талай ивкIун ур Прибалтиканаву. Щаву дирну, госпитальданий хъин хъанай ивкIун, муния махъ Белорусский фронтрай талай ивкIун ур. Контузия хьуну, душманначIан ясирну агьну ур. ИвкIуну ур 1944-ку шинал Франциянаву лагерьдай. Ваная кIулсса цамур зат бакъар. Нуруттиннул увагу ца оьрчI ивкIун ур, Пайзуттин тIисса. ЦIанасса чIумал мугу акъар, аьпалул хьуну. Нуруттиннуя аьпалун ливчIун бур кIива арснал душ.
Мурадов Бадави увну ур 1913-ку шинал ГьунчIукьатIрал шяравасса заргал ХIажимурадлул ва Гьухъалиятусса Рабиятлул кулпатраву. Дянивмур Азиянаву, Бухаралий, мусил усттарну зузисса ХIажимурадлул кулпатгу цачIанма бувцуну бур. Мукун, Бадавинал Бухарнаву къуртал бувну бур 7 класс, муния махъ бувккуну бур педтехникум, биологиялул отделение. 1936-ку шинал Мурадовхъал кулпат зана хьуну бур Дагъусттаннайн. Шихун увкIун махъ Бадавинал бувккуну бур Дагъусттаннал шяраваллил хозяйствалул институтрал химиялул факультет. Бадави зий ивкIун ур ГьунчIукьатIрал школалий учительну, химиялул ва биологиялул дарсру дихьлай. Та чIумул оьрчIаву Бадавинал сий хъуннасса диркIссар. Ванал дарс дирхьуминнавух ивкIссар махъ дунияллийх цIа дурксса аьлимчу хьусса Дандамаев МухIаммадгу, уку-укунсса оьрчIан кIулшиву ва тарбия дуллай бивкIссар Бадави кунмасса жулва зунттал учительтал. Бадави Мурадов ивкIссар му школалул завучнугу, яла директорнугу. Ва ивкIун ур цалла даву ххуйну кIулсса, куртIсса кIулшивуртту дусса педагог.
Аьбдуллагьихъал ПатIимат тIисса душ язи бувгьуну, Бадавинал бувну бур кулпат. 1941 шинал, жагьилсса кулпатгу, кIива мюрщисса оьрчIгу кьабивтун, лавгун ур аьралуннавун. Гуржиянаву Телави шагьрулий аьрали училищалуву дуклай ивкIун ур. 1942 шинал октябрьданий Клухордал переваллай виричунал кунна жан дуллуну дур. Мукуна дяъвилул цIарава зана къавхьуссар Бадавинал уссу Загьидигу. Бадави чув ва цукун ивкIуссарив бусан дяъвилия махъ шяравун увкIссар ванащал архIал талай ивкIсса кIундиричу.
Бадави Мурадовлуя ливчIун бур кIива оьрчI: София ва Сулайман. Ппу аьрайн нанисса чIумал Софиян 2 шин диркIун дур, Сулайманнун тIурча, бувагу 40 гьантта. Бадавинал цIа дуллуну дур Сулайманнул арснан.
Аьрщарайх заназиминнан аьрщаравуминнал цIарду дакIнийссаксса миннал аьпагу абадссар. Нуруттиннун ва Бадавинангу, вай кунмасса чIявусса цайми вирттаврангу бивкIу бакъассар.
