ДакIурдин малхIансса байран

Ларгсса шинал пандемия сававну Зумаритавал байран дуван къавхьусса оьрчIругу, хъунимигу гьашину байрандалух мякь бувккун бушиву чIалай бия. Хъиривлахъу буллалисса кунма, нацIу-кьацIулул хъирив бувксса оьрчIругу личIинува чIявусса бия. Байрандалул гьантрай Дагъусттаннайн увкIсса миллатирттал ишир­тталсса буллалисса федерал агентствалул хъунама Игорь Бариновлущал архIал Дагъусттаннал БакIчи Сергей Меликовгу ивуна Республикалул муфти, щайх АхIмад АпанниначIан, ва цувагу, ванал цIа дургьуну циняв бусурман агьлугу барча буван.

Сергей Меликовлул кIицI лавгуна Рамазан барз инсантурал ххуйми хасиятру аьч дувай­сса, хъинбалартту, хъиншивуртту дувайсса барз бушиву. Игорь Бариновлулгу кIицI лавгунни Зумаритавал байран,миллатру ва динну личIи къадуллай, кувннащал кув бавкьуну, нахIуну яхъа­нанисса агьалинан личIинура ххирасса байран душиву.

Вайннащал муфтиначIан бувкIсса делегациялувух ия Халкьуннал Мажлисрал председатель Хизри Шихсаидов, ХIукуматрал хъунама АьбдулпаттахI Амирханов, Дагъусттаннал БакIчинал ва ХIукуматрал Администрациялул хъунама Алексей ХIасанов. Вара кьини муфти барча уван ивунни МахIачкъала шагьрулул мэр Салман Дадаевгу. Дагъус­ттаннал муфтигу, агьалигу барча буллалисса чIярусса телеграммарду дуркIшиву баян бунни муфтиятрал цайми регионная ва кьатIаллил билаятирттая.

Барча буллалиминнавух Аьрасатнал ХIукуматрал хъунама Михаил Мишустиннул телеграммагу душиву бувсунни. Байрандалух мякь буккавриллив гьарцагу барча бавугу, цурда байрангу гьашину личIинура дакIурдин малхIансса дия тIий бия Да­гъусттаннал агьлу вай гьантрай кувннал кув барча буллалийни.
Жуварив цал уттигу мукIру хьуру Зумаритавал байрандалул агьали буниялттунгу хъиннува гъангу, дусгу бувайшиву, дакIурдивугу чумартшиврул бутIа ххибувайшиву.