Лакку мазрайсса Кьурандалул луттирал презентация

Ва ларгсса тталаткьини Ма­хIачкъалалив, Гранд-Плаза тIисса къатрал конференциярду дувай залдануву, хьунни ла­кку мазрайн таржума бувсса мубараксса Кьурандалул луттирал презентация.

Лакрал гьунар бусса чичу, историк ва таржумачи Сулайман Мусаевлул, хъунасса аьлимчу, профессор МухIаммад-Нури ХIусмановлул ва И.Ю. Крачковскийл оьрус мазрайсса текстру таржума бувну 2002 шинал итабавкьусса Кьурандалул лу цIуницIа итабавкьуну бия цIу буккангу бувну ХIажимурад аль-Кулил.

[dropcap]П[/dropcap]резентация дачин дурнугу ия лакрал миллатрал тарихрал хъирив агьсса Исмяил Аьлиев. ХIажимурадлул бувсуна лу цIуницIа итабавкьушиву редактор хIисаврай цахъи таржумартту дагьайкунсса кIанттайн дуцинсса, аьщуйн щуну мяъна дурчIин дувансса хIарачатгу бувну, аьраб мазрайнгу чул бивщуну, къакIулмургу кIулнахь цIухлай, гъалатI хьун къабитан яхI буллай. Луттирал спонсоршиву спортсментал хIаласса, диндалул ххуллу-ххуттай бавцIусса лакрал жагьилтурал дуршиву.

«Дагестан» ГТРК-лул хъунаманал хъиривчу, Аьра­сатнал культуралул лайкь хьусса зузала, машгьурсса журналист Ссалам Хавчаевлул бувсуна Сулайман Мусаевлул буниялттунгу, хъунмасса захIматгу бивхьуну, диялсса чIунгу харж дурну таржума бувшиву Кьурандалул лу лакку мазрайн.

[dropcap]Б[/dropcap]увсуна бюхттул­сса Шекспир, дунияллул классиктал лакку мазрайн таржума бувсса чичу унува, Кьурандалул лу таржума буллан айишиннин, цанма аьраб мазгу къакIулну бухьувкун, Сулаймангу таш-вишну ивкIшиву ва цалла даву лакран мюнпатну лякъинтIишиврий дакI дарцIуну махъ, хъинну хъирив лавну зий ивкIшиву таржумарттаха. Ссалам Хавчаевлул бувсунни Кьурандалул ва исламрал ххуйшиву ккаккан дурсса, мубараксса Кьурандалул лу оьрус мазрайн таржума бувсса академик Иман (Валерия ) Пороховащалсса интервьюгу телевидениялий дуршиву цала ва Дагъусттаннайн бувкIсса чIумал.

Презентациялиялий ихтилатру бунни лакрал машгьурсса чичултрал Ссугъури Увайсовлул, Хизри Илиясовлул, Алексей ХIажиевлул. Вайнналгу цалва ихтилатирттаву чIурчIав дурна Кьурандалул луттирал таржума диндалул ххуллу-ххагу лахьхьин, лакку мазрал аваданшивугу яхьун ка-кумагрансса давугу хъанахъишиврий. Презентациялий гьаз бувна, Кьуран цамур мазрайн таржума буван бучIиссар, къабучIиссар тIисса ихтилатру мудангу бивкIшиву, таржумарттал хIакъираву танийва щалвагу билаятрал аьлимтал бавтIсса кIанай аьлимтурал, ­аьраб маз къакIулнан Кьуран чичрулийнугу, мазрайнугу бувчIин бан шариаьтрай бучIи бувшиву.

[dropcap]Ш[/dropcap]и­ккува кIицI лаган, Кьурандалул цаппара аятру, мюршсса сурарду лакку мазрайн танийва таржума бувну бур щайх Жамалуттиннул, ГьунчIукьатIатусса Кьурбан­аьлил, аьлим Бархъаллал Оьмардул, профессор Ися Аьбдуллаевлул, чичулт Абачара ХIусайнаевлул ва Юсуп Хаппалаевлул. Кьурандалул лу щала таржума бувссия тарихрал элмурдал доктор МахIач МахIаммадовлул, ва «ЦIубарз» журналданий бивщуссия щаллуну.

Сулайман Мусаевлул таржума бувсса лу дунияллийн бувкссия 2002 шинал. 19 шинава куртIсса мяънарду дусса Аллагьу Тааьланал Бусрав­сса Калима – цIусса Кьурандалул лу цIуницIа дунияллийн бу­ккаву щалвагу лакрал миллатран барачатрансса давуну хьуннав! Ва луттираха зий бивкIминнал, ва лу дунияллийн буккан буван кабакьу бувминнал цIардугу миллатрал бусрав-барчаллагьрай зумух ласаваннав. Лу цуппагу ганзсса, цIакьсса мужаллат дусса, марцI-кIяласса, ххуйсса чагъарданий бивщусса бур.