Дагъусттан Республикалул Культуралул министерствалул чIарав бацIаврийну, «Культура» тIисса национал проектрал «Творчествалул инсантал» тIисса цIанилусса регионал проектрал лагрулий, Дагъусттаннал паччахIлугърал филармониялий хьунни Дунияллул халкьуннал дянивсса музыкалул ХIV фестиваль «Порт-Петровскаллал Ассамблеяртту».

[dropcap]Ф[/dropcap]естиваль дайдирхьуна Да­гъусттаннал филармониялул С. Хржановскийл цIанийсса камерный оркестрданул. Москавуллал консерваториялул хасъсса фортепианолул кафедралул доцент Михаил Лидскийл щаллу дунни фортепианолунсса ва оркестрданунсса Фредерик Шопеннул Концерт №1.

[dropcap]Ф[/dropcap]естиваль лахъи лагантIиссар майрал 27-ннин. Фестивальданул гьантрай МахIачкъала шагьрулул жяматраща ва хъамаллураща бюхъантIиссар Дунияллул халкьуннал дянивсса П. Чайковскийл цIанийсса конкурсрал лауреатътал Борис Андриановлущал (виолончель), Никита Борисоглебскийщал (скрипка), Дмитрий Шишкиннущал (фортепиано), мультиинструменталист Аркадий Шилклопердущал, Сербиянавасса сопрано Мария Йеличлущал, мукунма дунияллийх цIа дурксса цаймигу балайчитуращал, дирижертуращал, музыкалул коллективирттащал хьунабакьин, Дагъусттаннал халкьуннал артистка, филармониялул солистка Диана Увайсовал бивщусса музыкалух вичIидишин.

Дагъусттанналми оркестр­дачIан буккантIиссар дирижертал – АьФ-лул халкьуннал артист Валерий Хлебников, Василий Юркевич (Санкт-Петербург).
Фестивальданул концертир­ттай гьуртту хьун оьвкуссар Сосо Павлиашвилийн.

Порт-Петровскаллал Ассамблеярттал фестивальданул ахирну хьунтIиссар Мариинский театрданул Ухссавнил АьсатIин – Алания Республикалийсса Филиалданул Симфонический оркестрданул программа.