Май зурул 26-нния июнь зурул 1-ннийн МахIач­къалалив хьун тIий дур Дунияллул халкьуннал дянивсса к1илчинмур театрал фестиваль «Волшебный мир театра кукол стран БРИКС». Цувгу хас дурну дур Дагъусттаннал паччахIлугърал Ссихьрал театр хIасул хьуну 80 шин шаврин. Шиккува дакIнийн бутан, цалчинмур фестиваль хьу­ссия 2019 шинал Театрданул шинан хас дурну. Муний гьуртту хьуссар Бразилиянавасса, Индиянавасса, Китайнавасса ва Кьиблалул Африканавасса театрдал труппарду.

Фестивальданийнсса хIадур­шиннарайн багьайсса суаллу ххал бигьлагьисса батIаву хьунни ДР-лул Культуралул министерствалий министр Зарема Буттаевал каялувшиндаралу.
Муний гьуртту хьунни ва хъунмасса проектрай гьурттусса идарарттал каялувчитал.

Ссихьрал театрданул каялувчи Аминат ЯхIияевал бусаврийн бувну, фестивальданий гьуртту хьун тIий бусса бур вай театрду: Астраханнал, Белгородский, Волгоградуллал областьрал, Вологодуллал областьрал, В. А. Вольховлул цIанийсса Воронежуллал, паччахIлугърал ссихьрал («Каштанка»), А. Н. Афанасьевлул цIанийсса Кировуллал ссихьрал театр («Гоголь. СПб»), Мытищинский театр «Огниво», Рязаннал областрал театр.

Фестиваль тIитлатIисса шадлугъ хьун тIий дур май зурул 26-нний Оьруснал театрданул хьхьичIсса майданнив.
ТIитIин тIий дур фестиваль Евпатория шагьрулиясса Образцовый театрданул. Дагъусттаннал паччахIлугърал ссихьрал театрданул фестивальданий ккаккан бан тIий бур премьера «Маленькие трагедии», А.Пушкиннул поэмартту гьануну лавсъсса.

Фестивальданул лагрулий хьун тIий дур кIулшиву дулаврил программартту, мастер-классру ва «Театр – зеркало эпохи» тIисса ккаккия.
Эпидемиологиялул захIматсса тагьар хIисаврайн ларсун, Бразилиянавасса, Индиянавасса, Китайнавасса ва Кьиблалул Африканавасса театрал коллективирттал спектакллу ккаккан бан тIий бур онлайн-кьаралданий. Шиккува дакIнийн бутан, цалчинмур фестивальдания махъ театрал критиктал ва хъамал кIицI лаглай бия ва хъуннасса мероприятие сававну, дунияллул халкьуннал дянивсса гуманитар дахIавуртту цIакь хьушиву ва фес­тиваль цурдагу хьушиву муний гьуртту хьусса билаятирттал ва шагьрурдал дянивсса дусшиврул лишанну.
«Жун тачIав хъамакъабитан­ссар цуксса хIурматрай, дакIру тIиртIуну хьунабавкьуссарув жува Дагъусттаннай. Ва фестиваль хъинну агьамсса ишну хьуссар цив цачIун баврих мюхтажну бивкIсса дунияллул творчествалул ккурандалун. Ва цачIуншиврун Дагъусттаннаяр хъинсса кIану цамур къаля­къинссия. Ва караматсса республикалий кувннащал кув бавкьуну ялапар хъанай бур чIявусса миллатру, хIала дурххун дур миннал культурарду. Жу хIайранну ливчIунну ва республикалийн­сса аьрххилия», – укун цала асарду кIибачIлай ия та базилух Бразилиянал «Иллюзория» тIисса ссихьрал театрданул каялувчи Годинья Роша.

Фестивальданул сакиншинначитал бур Дагъусттаннал паччахIлугърал ссихьрал театр, Аьрасатнал драматургтурал гильдиялул автортурал проектирдаха зузисса центр, Дагъус­ттан Республалул ХIукуматрал, Культуралул Министерствалул, МахIачкъала шагьрулул администрациялул, А. А. Бахрушиннул цIанийсса паччахIлугърал центральный музейрал ва Аьрасатнал театрал ишккаккултрал союзрал «UNIMA» тIисса Аьрасатнал центрданул кабакьаврийну.