[dropcap]Б[/dropcap]айрандалул хьхьичI гьантрай МахIачкъалаллал Ххувшаврил музейраву хьунни «Аьра­сатнал БивкIу бакъасса полк» тIисса щалва билаятрал регионнай кIицI ларгсса проектравух жулла республикалия гьур­тту хьусса дуклаки оьрчIру лахъа-хъун буллалисса ва вайннан бахшишру дуллалисса шадлугъ.

Аьра­сатнал циняр регионнаясса оьрчIан бахшишру дуллалисса хъуннасса шадлугъ хьуссия гьантрал хьхьичI Москавливгу. Жулла республикалия гьуртту хьусса оьрчIавух дипломран ва бахшиширттан лайкь хьуссар Хасавюртуллал райондалийсса Муцалауллал школалул 4-мур классрал дуклаки душ Акайчикова ПатIима. Ванил «Правнуки победителей» тIисса хъиривлаявурттал даву лайкь хьуну дур проектрал жюрилул язи дугьан.

Цурда конкурсравух щалва Аьрасатнава ва 30 чил хIукуматирттая гьуртту хьуну ур 9 азараксса дуклаки оьрчI. Вайксса гьурттучитурава жула дагъусттандуш хьхьичIунминнавун буккавугу ххарисса хаварданун ккалли бан бучIиссар.

[dropcap]М[/dropcap]оскавлив хьусса конкурсрал хъуннасса шадлугърай сахIналий лауреатътуран бахшишру тапшур давривух гьуртту хьуну бур Аьрасатнал халкьуннал артистал, АьФ-лул Минобороналул Хъунмур архиврал пишакартал ва жяматийсса ишккаккулт.

[dropcap]Ш[/dropcap]адлугърал ахирданий циняв гьурттучитуран сакин дурну дур «Халкьуннал Чувшиву» тIисса экспозициялийнсса экскурсия ва «БивкIу бакъасса полк жула гьарнал дакIурдивур бусса» тIисса хъуннасса концерт.