Аьлил ЖахIпаровичлул оьрмулувусса яла агьаммур байрандалул кьини ветеран барча ан ванал ужагърайн бувкIунни ЦIуссалакрал райондалул бакIчи МахIаммад-ХIажи Айдиев, ДР-лул Халкьуннал Мажлисрал депутат Амирхан Амирханов, ЦIуссалакрал райондалул агьали цIусса миналийн бизан баврил управлениялул хъунама ХIажи Султанов, ЦIуссалакрал райондалул УСЗН-далул хъунаманал бигарду биттур буллалисса Зарема Аьлиева, социал къуллугърал ва культуралул къатлул зузалт.
ХIакьинусса кьини ва ур ЦIуссалакрал райондалий ливчIссавагу ца ветеран.
Аьлиллун цIана 98 шин дур. Цуксса кьурчIинугу, шиная шинайн бухлавгун най бур жулва ветерантал, къучагъшиврийсса ирс жунма кьабивтсса. Гьашину ЦIуссалакрал райондалий Ххувшаврил байран хьунадакьин кьисмат къавхьуну, жула дянива лавгунни дяъвилул ветеран Аьвдулхаликь Аьлимов.
Аьлиллун, хIакьину кунма, дакIний бур цала бивтсса аьрали ххуллу. Хъамаллурахь ванал бувсунни тай шиннардий хьусса цаппара дяъвилул иширттая.
1941 шинал дяъвилийн лавгсса чIумал Аьлил 18 шинавусса жагьил ивкIун ур. Ванал аьрали ххуллу бур, 90-мур минометчиктурал, битултрал полкраву, Воронежрая байбивхьуну, Варшавалийн бияннинсса. Дяъвилий ванайн цимилгу щавурду дирну дур. 1949 шинал къуртал хьуну бур ванал дяъвилул ххуллу.
Аьралуннаву дурсса къучагъшивурттахлу лайкь хьуну ур цикссагу паччахIлугърал наградарттан, Буттал КIанттул цIанийсса Хъун дяъвилул ордендалун, ЗахIматрал ЯтIул Ттугълил ордендалун.
— Барчаллагь вин, Аьлил ЖахIпарович! Буттал аьрщи душмантурацIа марцI дуккан дуллай ина дурсса чувшивурттал багьа бакъассар. Ина кунмасса виртталли ялун нанисса ник Ватан ххирану тарбия даврин эбратну хъанахъисса, – увкунни цала ихтилатраву МахIаммад-ХIажи Айдиевлул.
Ветераннан аьрали балайрду увкунни культуралул къатлул зузалтрал. Аьлиллун хъинну асар хьунни, ужагърайн бувкIун, цахра дурсса аякьа.
Зарема Аьлиевал ветераннайн тапшур бунни ДР-лул БакIчи Сергей Меликовлул чулуха барча уллалисса чагъаргу ва дакIний личIансса лугу.
