[dropcap]М[/dropcap]айрал 15-нний «Журавли» тIисса цIуллу-сагъшиву цIакь дайсса комплексрал хIаятраву дия хъуннасса шадлугъ. Шикку, Ухссавнил, ЛухIи хьхьирил ва Каспийскаллал флотирттал вакилталгу гьурттуну, тIитIлай бия бусалардавун агьсса дагъусттанчу, жула бусравсса подводник, Совет Союзрал Виричу МахIаммад ХIажиевлул цIа дирзсса гидрокомплекс.
Шадлугъ хас дурну дия Буттал кIанттул цIанийсса Хъунмасса дяъвилий Ххувшаву ларсун 76 шин хьусса тарихийсса иширан. Мукунма шадлугърай гьурттуну бия ДР-лул Халкьуннал Мажлисрал депутатътал, ветерантал ва рахIму-цIимилул сакиншиннардил вакилтал, виричунал шяравалу дирхьусса Гъуниннал райондалиясса делегация, жяматийсса ишккаккулт, студентътал ва дуклаки оьрчIру.
Шадлугъ тIитIлай, уттинин ларгсса циняр байраннащал гьурттучитал барча буллалисса ва батIаврил мурадрая бусласисса махъ лавхъуна МГУ-рал профессор, «Журавли» НОК-рал хъунама МахIаммад МахIаммадовлул.
Виричунал дяъвилул шиннардий дурсса чувшивурттаягу бувсун, МахIаммад МахIаммадовлул кIицI лавгуна гидрокомплекс ялун буруган архитектуралул чулуха МахIаммад ХIажиев аьрали къуллугърай ивкIсса «Катюша» тIисса щинал лултту буккай жамилул куццирай бувшиву. Ва гидрокомплекс бувну бусса бур шиккун цалла цIуллу-сагъшиву цIакь дан бучIантIисса къашайшалтран рахIатну, чурххан бигьасса шартIру дузал дурну.
[dropcap]М[/dropcap]укунма ванал бувсуна «Журавли» НОК-рал хIаятраву цивппа М. ХIажиевлул цIанийсса щинал лултту буккай жамирдал музей тIитIинсса мурадрайгу бушиву.
Ухссавнил флотрал вакил, генерал-лейтенант Николай Мосинцев-Озеранскийл, Совет Союзрал Виричу МахIаммад ХIажиевлул Хъун дяъвилул тарихраву кьадиртсса яргсса лажинтгу дакIнийн дуртун, кIицI лавгуна дагъусттанлувтуран хъунмасса пахру бикIан аьркиншиву укунсса виричу цала ушиврия ва ганан лайкьсса арсру-душру тарбия буллан аьркиншиврия.
Яла ванал, Виричунал цIанийсса тIитIин дакIнийсса музейраву дишин цIа куну, пишкаш дуруна Ухссавнил флотрал икона ва машгьурсса адмирал Федор Ушаковлул бюст.
НОК-рал пишакартурал бусаврийну, цIуну тIивтIусса гидрокомплексраву къашайшалтрал цIуллу-сагъшиврун мюнпатсса 14 процедура буллантIий бусса бур.
Каспийскаллал флотрал командующий Александр Пешковлул мукунма кIицI лавгуна МахIаммад ХIажиевлул цIа дирзсса цимурца цIу бусса ва сийлийсса тарихран ккаллишиву.
«Хъунмасса бахттилун ккалли бувара ттула оьрмулул агьамсса гьарца шачIану МахIаммад ХIажиевлул цIаницIун бавхIусса бивкIшиву. Мадарасса шинну дурссар на аьрали къуллугърайсса чIумал Гаджиево тIисса шагьрулий яхъанай. Яхъанайгу икIайссияв виричунан цIа дирзсса кучалий, ттул арсгу дуклай ивкIссар М.ХIажиевлул цIанийсса школалий. Виричунал цIаницIун бавхIусса гьарцагу оьрмулул лахIза ттул дакIниву мугъаятну бурувччуну буссар», – увкуна Каспийскаллал флотрал хъунаманал.
Махъру шикку ялагу лавхъуна Дагъусттаннал аьрали комиссар МахIаммад Даитбеговлул, ДР-лул БакIчиначIасса Хъунисриннал советрал вакил Шарабуттин Иниговлул, Гъуниннал райондалул бакIчи МудунхIажи Кьадировлул ва цайминнал.
Дуклаки оьрчIал Виричунан ва Хъун дяъвилул цинявгу ветерантуран хасну шеърирду бувккуну махъ, гидрокомплексрал чIирай М.ХIажиевлул мемориал ула тIитIаврин хасну ятIул лиссу кьуркьуна. Яла цинявннан комплексрал каширду ккаккан дуллалисса ва шикку буллантIисса процедурарттая бусласисса гьарта-гьарзасса экскурсия сакин дуруна. НОК-рал пишакартурал бусаврийну, цIуну тIивтIусса гидрокомплексраву къашайшалтрал цIуллу-сагъшиврун мюнпатсса 14 процедура буллантIий бусса бур.
Ччаруллал, къюкIлил, туннурдал, ттурчIардил, неврологиялул ва цаймигу личIи-личIисса азарду дусса агьалинаща бюхъантIиссар шиккун бучIаван. Бур шикку мюрщи оьрчIансса бассейнну ва 10-15 инсан гьансса кIива джакузигу (хIавз). ХIасил, инсаннал цIуллу-сагъшиврун буз хьунсса шартIирдал центр бур.
Шадлугъ къуртал дуруна, хъамаллуран дакIний личIансса куццуй, хъуннасса концертрайну ва фейерверкру итадакьаврийну.
