Ларгсса нюжмардий Национал библиотекалул конференц-залдануву чIявучин кIулсса художник, журналист ва публицист Марат ХIажиевлул давурттал альбом-каталограл презентация хьунни. Художникнал уттинин канила дурксса давуртту цачIун дурсса «Вечерние поля. 2240 шагов от Батырая до Капиева» тIисса луттиращал кIул хьун ва презентациялий гьуртту хьун шиккун бувкIун бия хъуншагьрулул интеллигенциялул вакилтал, даврил уртакьтал, шаэртал ва журналистътал.
300 экземпляр итабавкьусса альбом-каталог Марат ХIажиевлул хIадур бувссар ларгмур шинал дурххусса Дагъусттан Республикалул БакIчинал грантрал кумаграйну. Маратлул 1995 шиная 2021 шинайннин чинилул бушкъапирттай дирхьусса суратру дакъасса, каталограй рирщуну дур «Дневник художника» тIисса цIанилусса, цащала архIал Батирайл цIанийсса кучалий чIярусса шиннардий дуссукъатлуву зий бивкIсса художниктураясса дакIнийнбичавуртту, шеърирду ва макьалартту. Ва дуссукъатта Дагъусттаннал художниктурал ккураннаву кIулну бивкIссар чинилул тIахIнилий, хъунмурчIин бушкъапирттай, суратру дишайсса художниктал цачIун хьусса кIануну. 1991 шинал МахIачкъалаллал ца яла бухсса кучалий тIивтIуну бивкIсса художниктурал дуссукъатлун гьашину хьунтIиссар 30 шин.
Шиккун Марат зун увкIун ур цIубакIрай художниктурал кьюкьлувун кьянкьану уххан сикъаслай ивкIсса 1995 шинал. Гания мукьах гьунарду чIявусса ва хьхьичIунсса художниктурал цIа дан лайкьсса ва усттаршиврул чулуха язиминнавухсса художникну ккалли хьуну ур. Га дуссукъатлува бувкссар цIана личIи-личIисса шагьрурдайх ппив хьусса, Дагъусттаннал художниктурал школалул цIа лайкьну ядуллалисса 30-сса художник. Батирайл цIанийсса кучалий гьану бивзсса чинилул тIахIнилий суратру дишайсса художниктурал дуссукъаттагу цIана миналул хьуну буссар А.Къапиевлул цIанийсса кучалий. Каталограл цIагу ва иширацIунни дархIусса.
Луттирал презентация дачин дурну бия жунма чIявучин бусравсса шаэр ва публицист, Марат ХIажиевлул сакин дуллалисса выставкарттавух ва шадлугъирттавух мудангу чялишсса гьурттушинна дувайсса Миясат Муслимова. КIицI лавгуна ванил дан бакIрайн ларсъсса цимурца даву дирчIан дурну дувайсса Маратлул чичайсса шеърирдугу, публикациярттугу, канил дишайсса суратругу – цимурца ябацIансса ва дакIнивусса асарду щурущи бан бюхъайсса кашилул гьунарду бушиву.
Бувсуна Маратлулгу альбом – каталог сакин баннин оьрмулуву цанма хьунабавкьусса ххаллилсса, магьирсса художниктураягу, гайннащал зий-занай дирчу кьинирдугу, дакIнивусса гьавасру суратрайну загьир бан хIарачат бан буллай ивкIсса цаламур захIматрал ххуллиягу. Ванал бусаврийну, га дуссукъатлувун увкIун цаппара хIаллава, искусствовед Мариян Чалабовал хIарачатрайну, гай къабигьасса 90-ку шиннардий сакин дурну диркIссар «Аьламат» тIисса цIанилусса жагьилсса художниктурал выставка. Гания хьуну дур Маратлул творчествалул ххуллул дайдихьугу.
Художникнан тIайлабацIу ва хъиндайдихьу чIа тIисса махъру шикку мукунма лавхъуна археолог Рабадан МахIаммадовлул, журналистътал – Светлана Кривоносовал ва АьбдурахIман Юнусовлул, хIакин-офтальмолог Аьбдулла Аьбдуллаевлул ва цаймигу ванал дустурал ва уртакьтурал.
Шиккува дакIнийн бутан, каталогравун ларсъсса давурттал «Вечерние поля» тIисса выставка хъинну лахъа-хъунну ва лайкьну хьуссия ларгмур шинал сентябрьданий Поэзиялул театрдануву.
Утти ва альбомрал презентация хьунтIиссар июньдалий Москавлив Маратлул цала дусталгу, тийх ялапар хъанахъисса жула ватанлувталгу лагма лавгун.
