Бигьалагай гьантрай Дагъусттаннай дайдихьлай дур Арт-фестиваль «Праздник выходного дня».
Мунин хас дурсса пресс-конференция хьунни Др-лул Культуралул министерствалий.

---

Проект щурущи бувну бур Республикалул Туризмалул ва халкьуннал сянатирттал, Спортрал, Информациялул ва печатьрал министерстварттащал цачIуну, Да­гъусттан Республикалул БакIчинал кабакьаврийну.

Байран дайдихьлай дур ялун нанисса ххуллун кьини, май зурул 22-нний, ва му дикIаван тIий дур гьарца бигьалагай гьантрай Лениннул майданний ва Родопский бульварьданий (16:00-нний дайдирхьуну, 20:00 ссят хьуннин) октябрь зурул 2-ннийн дияннин.

Культуралул министр Зарема Буттаевал кIицI лавгунни, республикалул магьирлугърал майданний дагъусттанлувтал бигьалагансса хъуннасса магьирлугърал даву дуллай бухьурчагу, кIичIираваллил магьирлугъ жучIара хьхьичIуннай хьун дурану душиву.

«КIичIирал магьирлугъ – му тархъансса творчествар, му шагьрулул агьалинащал магьирлугърал мазрай жап учаврил цамур кьяйдар.
Шагьрулул магьирлугъ хьхьи­чIунну дур Аьрасатнал ва дунияллул чIявусса шагьрур­дай. Дагъусттаннал магьирлугърал ляличIишиву ва хасшиву хIи­саврайн ларсун, жущавагу бюхъан тIий бур тайнная чIявусса затру лахьхьин, кьамул бан», – увкунни Зарема Буттаевал.

Министрнал тIутIимунийн бувну, фестиваль дан дакIний бур шагьрулул агьали ва хъамал яла чIявуну бигьалаган батIайсса кIива майданнив: Лениннул цIанийсса майдан ва Родопский бульвар.
Фестивальданул программалия гьарза-гьартану журналистурахь бувсунни Республикалул Халкьуннал творчествалул къатлул директор Марита МухIадовал, Изобразительный искусствалул музейрал директор СалихIат ХIамзатовал, Филармониялул директор Абакар Хайрулаевлул ва Этнический культуралул центрданул арт-директор Пат1имат ХIусайновал.
Мукун Лениннул майдан гьарца бигьалагай гьантрай кIура баллан тIий бур хIакьсса магьирлугърал майдандалийн.
Шикку гьуртту хъанан тIий бур музыкалул ва къавтIаврил коллективру, районная бувкIсса миллатирттал театрдал артистурал ккалан тIий бур ниттил мазурдийсса шеърирду, шаван тIий бур Дагъусттаннал художествалул училищалул преподавательтурал ва студентътурал Арт-пленэрду, «Открытая библиотека» проектрал лагрулий ччиманаща бюхъан тIий бур цанма ххуй бивзсса лу буккин ва машан ласун, дикIан тIий дур выставкарду, мастер-классру, дефилерду, оьрчIансса интерактив программарду, оьрчIру бялахъайсса майданну (шашкардай, шахматирттай, дартсрай, бадминтондалий буккайсса) ва чIярусса цаймигу дялахърурду.
Шагьрулул агьалинал ва хъамаллурал тIалавшиннардах бурувгун, программа бюхъантIий дур даххана дангу.
КIилчинмур майдан бикIан тIий бур Родопский бульварданий.
Бигьалагай гьантрай шикку зун тIий бур музейрал идарартту гьурттусса проектру «Уличный музыкант» ва «Арт-пленэр».
«Уличный музыкант» проектрал ляличIишиву ссаву дур чирча, классикалул инструментирттай (скрипка, саксофон, труба, гитара…) руцаврищал, шикку вичIидишин бюхъан тIий бур халкьуннал инструментирттай руцлацисса макьаннахгу (тар, пандур, къумуз). Мунийн бувну, да­гъусттанлувтураща ва туристураща бюхъан тIий бур Дагъусттаннал миллатрал музыка цала бусса кьяйдалий баян.

«Арт-пленэр» проектрая бусларча, ва культуралул сипта байбишин тIий бур машгьур­сса Да­гъусттаннал художниктал гьурттусса «Мосты» тIисса арт-группалия, цалгу тIивтIусса площадкалий цалчин ккаккан бан тIий бур Этнической культуралул центрданул проект «Воркшоп».
Ва пикри хIасул хьуну бур художниктураща ва музыкантътураща музейрдаву ва концертирттал заллавунияр паркирдаву тархъанну зун бюхъаврищал, миннал давривун бигьалаглаги­у кIункIу хьун бан бюхълай бушиву хIисаврайн лавсун.
«Жул вихшала дур ва фестиваль кIичIираваллил магьирлугъ хьхьичIуннай дансса хъиндайдихьу хьунтIишиврийн. Умуд бур фестивальданул цаппара кьяйдарду республикалул творчествалул элиталул ва жагьилсса художниктурал ва музыкантътурал кабакьаврийну куцциравун дагьанссар, цаппарасса тIурча, халкьуннан тIалавну личIанссар тIисса.
Паркирдаву баллан аьркинссар музыка, мукунма академический журалулссагу.
Жун чIалай бур жула художествалул ккуран жу дулла­лимуницIун цачIун хьуну, арт-пленэрду миннал оьрмулул кьаралну хьунсса кунма. Миннал творчествалул тархъаншиврул дазу шикку къадикIантIиссар. Багьлай бур так дайдихьу дан, халкь цивппа кIункIу хъанантIиссар», – увкунни Зарема Буттаевал.