Майрал 18-нний ДР-лул БакIчи Сергей Меликовлул каялувшиврий хьунни ДР-лий коронавирусрал инфекциялийн къарши буккаврил Оператив штабрал батIаву.

Сергей Меликовлул тIиму­нийну, гьашину коронавирусрал инфекциялущалсса талатавриву хъуннасса дахханашиву хьун аьркинссар. «Вакцинациялийн чул бивщуну жува ххув хьун аьркинссару му баласса азардануяр. Амма хIакьинусса кьини вакцина баврил ккаккияртту, цайми регионнах бурувгун, хъинну яларайсса дур. ХIакьину, вакцинартту къабувну, цамур куццуй къашайссар инфекциялул хьхьичIалу кьукьин», – кунни ДР-лул БакIчинал.

ХьхьичIмур Оператив штабрал батIаврий протоколданийн лавсъсса хIукмурду бартбигьаврил хIакъираву ихтилат бунни ДР-лул ХIукуматрал Председательнал хъиривчу Анатолий Карибовлул. Мунал тIимунийну, хIакьинунин республикалийсса 43,4 азара медициналул зузалтравату вакцина бувну бур 13,6 азаруннал. Мукунма 11,1 азара социал идарарттал зузалтравату вакцинартту бувну бур 2,6 азара инсаннал. Республикалул министерстварттал ва идарарттал аппаратирттал зузалтрава вакцинартту бувну бур 497 инсаннал, ягу 22,4 %, цинявппа зузалт бу­сса бур 2222. Майрал 17-ннийнин республикалул дуккаврил системалуву зузисса 107,5 азара инсаннавату анжагъ15,1 азаруннал бувну бур вакцинартту
ДР-лул цIуллушиву дуруччаврил министр Татьяна Беляевал бувсунни республикалий къашайшалтрах цукунсса къулагъас дуллай буссарив, вакцинартту муниципалитетирттайх бачIаврил хIакъираву, циксса вакцинартту бучIантIиссарив ттигу республикалийн.

Республикалул хъунама санитариялул хIакин Николай Павловлул бувсунни коронавирусрал къашайшиврул статистикалия. Роспотребнадзорданул бакIчинал тIимунийну, республикалул 12 муниципалитетрай къашайшалт гьарза хъанахъи­сса ишру хьуну бур. Миннувух бур Каспийск, Избербаш, Хасавюрт шагьрурду, мукунма Бущихъиял, Сергокъалаллал, Казбекуллал, Ххунзахъиял ва цаймигу районну. МуницIунма 17 муниципал сакиншинналий къашавайми сияхIрайн лавсъсса ишру хьуну бакъар.

БатIаврий ххал бивгьунни мукунма банкетирттал заллу тIитIин ихтияр дулаврил хIакъиравусса масъалагу. Сергей Меликовлул му масъалалул хIакъираву увкунни: «На тапшур буллай ура бизнес-омбудсменнайн хьунаакьин ХъатIал индустриялул ассоциациялул вакилтуращал. Зий байбишинсса ихтияр дулун бучIиссар, амма му ххуллий ишбажаранчитал марцIну зун аьркинссар. Цал ттигу тIий ура, салкьи хьияра циняв цачIун, ххал дигьияра зузаврил кьяйдарду, яла нагу кабакьинна зул бизнесрацIун.

Кинотеатрдавугу, театрдавугу, рестораннавугу, банкетирттал заллавугу дуручлан аьркинссар Роспотребнадзорданул тIалавшинну, миккун батIлатIисса инсантал бурувччуну бикIаншиврул. Мунийн бувну на лаизлай ура ХъатIал индустриялул ассоциациялийн, ДР-лул БакIчинал хIукмурдал тIалавшинну дуруччин аьркиншиву.
БатIаврий гьаз бунни цаймигу масъаларту.