Ветеран лахъа-хъун унни

Ххувшаврил кьинилийн

Цуксса хIайпнугу , Хъун дяъвилул ветерантал лагавай бур жула дянивату. ХIакьину ЦIуссалакрал райондалий ливчIун ур увагу ца дяъвилул ветеран – Буттаев Аьлил ЖахIпарович.

Ва ялапар хъанай ур ЦIу­миналийсса ЦIуссалакрал шяраву. Апрель зурул 22-нний там хьунни Аьлиллун 98 шин. Аьлил ЖахIпаровичлул бивтсса бигьа бакъасса оьрмулул ва захIматрал ххуллу бур махъа нанисса никиран эбратрансса. Ветерантурал, дяъвилул талатавриву дурсса къучагъшивуртту дакъассагу, дяъвилия махъсса чIумалгу, хIукумат ччаннай дацIан дуллай, жула оьрму нирхиравун бутлай, чIявусса захIматру бивхьуссар. ЦIуссалакрал райондалий ветерантал лахъа-хъун буллай, вайннал бувсса захIматран лайкьсса кьимат бишлай, мудангу бусраврай ва аякьалий буссар. Аьлил ЖахIпарович дунияллий уссаксса, ванал аьрали ххуллий­сса къучагъшивурттая цIухху-бусурду бан букIлайнма буссар ваначIан дуклаки оьрчIру.

Ва ххуллухгу, Аьлил ЖахIпа­рович увсса кьини барча дан, ваначIан бувкIун бия УСЗН-далул директор Зарема Аьлиева ва КЦСОН-далул директорнал хъиривчу Аьбидат Аьбдуллаева.
Социал къуллугърал зузалтрал, Аьлил ЖахIпарович барчагу увну, дуллунни ванан бахшишру. Вайннал мукунна ххал диргьунни ветеран ялапар хъанахъисса къатта-къушлил шартIру, цIухху-бусу бунни ссал, ци кумаг аьркинну буссарив. Хавар бакъулий бувкIсса хъамаллурая ххари хьусса ветеран ва мунал кулпат дакIнийхтуну барчаллагьрай бия цивппа хъун бан бувкIсса хъамаллурайн.
Аьлил ЖахIпаровичлул кIицI лавгунни ссавур дакъа ялугьлай ушиву цала оьрмулувусса яла агьаммур 9-мур Майрал байран дучIаннин.

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: