Мазрал магьирлугърал дайдихьу фольклорди куну бур цимирагу шинал хьхьичI оьруснал чичу Максим Горькийл.
Халкьуннал аькьлу, паргалшиву хIасул хъанай дайдирхьуну дур цимирагу ттуршукулул хьхьичI, ва ялу-ялун ххуй хъанай, авадан хъанай дур. Лакрал халкьуннал дакIнихсса творчество мяъналул ва журардал чулуха хъинну авадансса дур: кувнная кувннайн буслай нанисса хаварду, магьри, балладартту, учалартту ва мукунма цаймигу.
Уттигъанну Дагъусттаннал элмулул центрданий бувкунни Мазрал, литературалул ва магьирлугърал институтрал зузалтрал хъирив лавну сакин бувсса «Свод памятников фольклора народов Дагестана» тIисса 20 томрайсса луттирал 7-мур том.
Ва хъанай дур чIярусса материал циву дусса даву. Луттираву хьхьичIва-хьхьичI ххал бивгьуну бур Дагъусттаннал циняв миллатирттал оьрчIансса фольклор. Лу сакин бувну бур кIива мазрай, ниттил мазрай ва оьрус мазрай, буккултран ишла бан, буккин бигьану бикIаншиврул. Ниттил маз ххуйну къабувчIлачIиминнан кумагну хъанай бур оьрус мазрайн таржума даву луттиравусса циняв назмурду.
Жула мюрщи оьрчIан лакку маз лахьхьин бавриву хъунмасса кIану бугьлай бур фольклорданул. Цалчин буллалисса ниттил ихтилат, оьрчIал кIанттухсса балайрду хъанай бур чIиви оьрчIан маз лахьхьаврил дайбихьуну. Ниттин цила оьрчI ччай ур нигьа къаусайсса, аькьлулул увччусса, виричусса инсан хьуну:
Ина, чаний, чув шивуй,
Чил душнил заллу шивуй,
Мюрщи оьрчIал ппу шивуй,
Илданул хIаким шивуй!
Цайми балайрдаву ниттил хъунмурчIинсса мурад бур цила оьрчIая ххишаласса, буттал кIану буруччин бюхъайсса виричу шаву.
Буттал кIантту буруччай
Виричу вия хьуннав,
Аьскартурал дяниву
Заву ласайсса хьуннав!
Душниха бувми балайрдаву душ чIалачIи буллай бур нитти-буттал пахру бансса, дакI ххуйсса хьуну ччай бушиву. Ва лащан буллай бур ца яла ххуйми, цIа ларгми душвараха:
Нажазиял Изажагу инара,
Гуржиял ХIурупанигу инара,
Ялагълардал Бажикъизгу
инара…
Аьндархъиял Хъатумигу инара.
Луттирал ца ххуйсса бутIану хъанай бур мюрщи оьрчIал буллалисса тIуркIурду. ОьрчIансса саннарду, балайрду ва цайми фольклорданул ххазинартту батIлай, гай цачIун бувну, мюнпатну ишла буллан хъунмасса захIмат бивхьуссар (аьпа баннав цал ) фольклорист Халил Халиловлул.
Мюрщи оьрчIахь дуккайсса саннарду хIакьину, чан-чанну тIий, хъамаритлай дур. Ва луттираву дур цаппара хъиннура хьхьичIарассагу, хIатта махъругума къабувчIайсса, яни мяънанияр мукъурттил тIуркIу ялттусса:
Ва ибитIа,
Ва щибитIа,
ЩитIалтIал
Кьавкьу битан,
Хъун ххурупIай.
ЧIирай кIурчIлу,
Ккукку-мукку,
Панкь-шанкь.
ГъаймикI, гъаймикI –
Гъана бургъил бассайсса.
Гъана баргъ, гъана баргъ
Къюллу сунух битайсса
Къюллу сун, къюллу сун,
Хъунмавхьу чахъу,
Хъунбавхьу чахъу,
БурцIил букайсса.
Нава –ца,
Цува –кIи,
КIулу- шан,
Шатта – мукь,
ОьрватIи – ххю,
ХхюнчIа – рях,
Арну –арул,
Мяйра –мяв,
УрчIра -урцIи,
Цинярдагу –ацI!
Укунсса саннардал оьрчIал маз авадан буллай бивкIссар, гайннан чIярусса затурдаясса кIулши диркIссар. Цуксса хIайпнугу, цIанасса мюрщи оьрчIру хъунмурч1ин укунсса тIуркIурдугу, саннардугу къабаллай, къакIулну хъуни хъанай бур.
Абир –зибир,
ЗинкIла –минкIла,
Учур –бучур,
КъяркI –мяркI,
ТIитIи ккукку,
Биракь ракь,
Панкьу –шанкьу,
Шанна шутI!
Луттираву биялсса кIантту бувгьуну бур лакрал магьрал. Аьмну ккаккан бувну бур личIи-личIисса магьрал журарду (хIайвантраясса, караматшиврул, багьу-бизулул). ОьрчIан хъинну хIаз бизай хIайвант инсаннал зумувну гъалгъа тIутIисса магьри, баснярду ва мукунма цаймигу. Агьамсса кIану бугьлай бур халкьуннал оьрму, хасиятру, давуртту ккаккан дуллалисса магьралгу. Миву ххуй чулий ккаккан увну ур зузала, захIмат буллалима ккаккан увну ур виричушиву дуллалиману, тархъаншиврул цIаний талатима, дусшиву ядайма, минная эбрат ларсун, миннаха лавхьхьуну яхъананшиврул. Оькки чулий чIалачIи увну ур цайминнай зулму буллалима, тIайлану къазузима, таммалшиву дуллалима. Ххуймунил ва оьккимунил дянив тапаватшиву дур магьраву. Бур магьри жанавартрал тIуллайну инсантурал тIул-тIабиаьт чIалачIи дуллалиссагу.
Гъирарай буккин ччисса бутIану бур луттираву ссигъри. Масала, бур, ца зат гамуниха лащан дурну, оьрчIал пикри, ня щурущи дансса ссигъри.
ХIасил, ва лу хъинну мюнпатну лякъинсса, гьарцаннал ужагърай бикIан аьркинсса лу бур, халкьуннал дакIнихсса творчествалул духкъалагай хъусну хъанахъисса.
Аьйша ХIаммакуева
