Вай гьантрай шагьрурдай ва щархъаву къуртал хьунни Ххувшаву ларсун 76 шин хъанахъисса тарихран хасъсса «Ххувшаврил чIавахьултту» тIисса щалва Аьрасатнал акция. Ва акция билаятрай дуллай сукку хьуссия ларгсса пандемиялул шинал. Гьашинумур акциялувухгу жулла республикалий гьуртту хьуну ур 300 азаруннияр ххишаласса инсан – дуклаки оьрчIру, студентътал ва хъуними.
Акциялул тIалавшиннагу дия, ларгмур шинал кунна, гьуртту хьун ччисса гьарнал цала къатрал чIавахьулттай дяъвилун, хъунмурчIин Ххувшаврин, хасъсса суратру дирхьуну, Хъун дяъвилул ветерантурахь барчаллагь учинсса. Халкь яхъанахъисса къатрал чIавахьулттай дакъасса, суратру дирхьуну дия х1укуматрал личIи-личIисса идарарттал чIавахьулттайгу. Социал сетирдаву акция най дуссия #ОКНА-ПОБЕДЫ тIисса хештеггу чирчуну.
Ванил сакиншинна жулла республикалий дурну дия ДР-лул Жагьилтурал иширттал министерствалул. Сакиншинначитурал бусаврийну, акциялул мурадну хъанахъиссар ялун нанисса ник Хъун дяъвилул тарих хъамабитулул хьун къаританну ва му ватан ххирану ва лавгмунил хIурмат буну тарбия дансса.
