«Буттахъал аьдатру» шагьрулул хъун майданнив

Ххувшаврил кьини жулла республикалул хъун шагьрулул хъун майданнив хьунни халкьуннал культуралул «Буттахъал аьдат­ру» («Традиции отцов») тIисса Республикалул фестивальгу. Ва сакин дурну дия ДР-лул Культуралул министерствалул, Республикалул Халкьуннал творчествалул къатлул МахIачкъала шагьрулул Администрациялул ва Культуралул управлениялул чIарав бацIаврийну.

[dropcap]Ф[/dropcap]естиваль дайдирхьуна «Пагьламантал» группалул. Ва кьини майдан бувцIусса тамашачитурал хьхьичIун бувккуна Дагъусттаннал паччахIлугърал опералул ва балетрал театрданул хор, Терскаллал казахънал балайлул ансамбль, «Каспий» ансамбль, республикалул районнаясса ва шагьрурдаясса творчествалул коллективру ва таксса гьурттучитал.

Цалнияр цал гурну ришлашисса хъатурдихун лаглай бия сахIналия фестивальданул гьурттучитал. Тамашачитурайн яла-яла асар биян бувна МахIачкъала шагьрулул оьрчIал искусствалул школалул театрданул творчествалул «Непоседы» тIисса студиялул оьрчIал ккаккан дурсса «Памяти жертв Бухенвальда» постановкалул.
Тамашачитал концертрая муксса рязийну бияхха, ларчIсса гъаращагума ми ххиев буван къавхьуна.