Тапшур бунни бартбигьлан Президентнал Рисалалул гьануми мурадру

Апрельданул 27-нний Дагъусттаннал БакIчи Сергей Меликовлул дунни паччахIлугърал ва муниципал властьрал органнал каялувчитуращалсса батIаву. Муний ккаккан бунни Аьрасатнал Президентнал Федерал Собраниялийнсса Рисалалул гьануми кIанттурду бартбигьаврил масъалартту.

Республикалул каялувчинал Гьарта-гьарзану бувсунни ттинин салкьи хьусса захIматми масъаларттая, Рисалалул мяъналия, муний ккаккан бувсса дузал буван аьркинсса мурадирттая.
Муниципалитетирттал бакIчитурайн Меликовлул тапшур бунни билаятрал Президентнал Рисалалувасса циняв тезисру бартдигьин аьркиншиву кIантту-кIанттурдай.
Дагъусттаннал БакIчинал тIимунийну, Рисалалуву кIицI бувну бур пандемия ттигу къуртал къархьуну душиву, мунияту аьркинну бушиву жаваблувну буручлан хIакинтурал ва санитар къуллугъирттал маслихIатру.

Инсантурал цIуллушиву ххуй-хъин даншиврул ккаккан бувну бур диспансеризациялул программа гьарта даву, му дайдишинтIий дур июльданул 1-нний.
– Президентнал масъала бивхьунни жула билаятрал агьалинаха къуллугърай дацIан дуван аьркиншиву цIусса медициналул технологияртту. Мира технологияртту ишла дуллан аькинссар Дагъусттаннайгу, – кунни Меликовлул.

Дагъусттаннал каялувчинал властьрал циняв даражардал органная тIалав бунни поликлиникарттал, оьрчIал багъирдал, школарттал, давурттал дузал байсса центрдал дуллалимур тIайлану дачин даву, дащуй дирхьунни Кьиблалул районнайсса цаппара объектирдал строительствалул давуртту.
Республикалул каялувчинал тапшур бунни арцу чун харж дурну дуссарив ххал дуван.

Мукунма мунал тапшур бунни оьрчIансса напакьартту цила чIумал буллалаврил ялув бацIан.
Гьаз бунни дуккаврил системалийн багьайсса, инвестортурал давурттал, бюджетрал кредитру лахъаврил чIун лахъи дуккан даврил, газ тIювахун буцин аьркиншиврул масъаларттугу.

Читайте также: