Апрельданул 28-нний ДР-лул ХIукуматрал Председатель АьбдулпаттахI Амирхановлул каялувшиврий хьунни ДР-лул хъусну хъанахъисса Аьрщарал участокирттай каялувшиврул мюнпатшиву лахъ даврил комиссиялул батIаву.

Муний ххал бивгьунни 23 масъала. Миннувух бия – аьрщарал категорияртту баххана баврил, аьрщарал участокру торгру къадурна ижаралий дулаврил, аьрщарал участокру республикалул хъуслия муниципал хъуслийн дуцаврил хIакъиравусса масъалартту. Комиссиялул члентурал, вичIигу дирхьуну, ххал бивгьунни гьарца масъала личIину.
Цаппара участокру шяраваллил хозяйствалул категориялия дурцунни промышленностьрал аьрщарал категориялийн. Комиссиялул члентал рязи къавхьуми масъалартту тIайла бувккунни, хъинну хъирив лавну, цIунилгу хIадур буван.

Комиссиялул батIаврий гьуртту хьунни ДР-лул ХIукуматрал Председательнал хъиривчу Манвел Мажонц, Росимущество ТУ-лул каялувчинал кIанайма Оьмахан Абакаров, МахIачкъалаллал бакIчи Салман Дадаев ва цаймигу.