Аьрасатнал Шяраваллил хозяйствалул министерствалул ва «Россельхозбанк» АО-лул цачIусса щалагу Аьрасатнал кIулшиву дулаврил хъунмасса проектрал лагрулий Дагъусттаннай сакин бан тIий бур Фермернал школа.
Микку хIадур буллан тIий бур шяраваллил хозяйствалул аралий зунсса пишакартал ва цачIун дан тIий дур федерал ва регионнал министерстварттал ва ведомстварттал, аграрный вузирдал, хъуннасса бизнесрал, фермертурал каширду ва бюхъурду.
Школалийн букIлакIиминнаща бюхъантIий бур лахьхьин фермерский хозяйство дачин даврил хьхьичIуннай хьусса кьяйдарду, ларай дан финансирттал ва экономикалул кIулшивуртту, лахьхьин хьхьичIунсса агротехнологияртту ва республикалул АПК-лул хьхьичIунсса идарарттай даву лахьхьин.
ДР-лул шяраваллил хозяйствалул министрнал цалчинма хъиривчу Шарип Шариповлул бусаврийн бувну, «Школа фермера» проектрансса арцу итадаркьуну дусса дур Россельхозбанкрал. Жула республика проектравун дутансса ДР-лул Минсельхозпродрал сипта хъинчулий ккарккун, мунин кабакьу бувну бур Москавливсса Россельхозбанкрал.
Ва школа Дагъусттаннай сакин баврил агьамшиву ссаву дур чирча, шяраваллил хозяйствалул хъус итадакьаврил аралий фермертурал бугьлай бусса бур 15 процент, фермертурал хозяйствардал аьдад хIисав дурну тIурча, жулла республика дуссар билаятрал лидертураву.
Школа сакин буллай бусса бур Дагъусттаннал паччахIлугърал Аграр университетрал гьанулий. Миккун занан бюхълай бур, дахьва байбихьлахьисса фермертураща бакъасса, зий дайдирхьусса фермертурал хозяйстварттал зузалтращагу.
ЦIанасса чIумал ДР-лул Минсельхозпрод Россельхозбанкрал Дагъусттанналмур регионал отделениялущал цачIуну ххал дигьлай бур дуккаврил курсирдал программа, жуламур региондалул аграриялул хасшивурттугу хIисаврайн ларсун.
Школалий дарсру дихьлан тIий бур Дагъусттаннал паччахIлугърал Аграрный университетрал, Федерал аграрный элмийсса центрданул, элму ахттар даврил институтрал преподавательтал, ДР-лул Минсельхозпродрал, Россельхозбанкрал ва цаймигу идарарттал зузалт.
ДачIи дарсру дихьлан тIий бусса бур ттизаманнул технико-технологическая база бусса ва даврил бюхъу кIулсса республикалул хьхьичIунсса хозяйстварттай.
«Ттизаманнул шартIирдай цалчинсса кIанттай дикIан багьлай бур цалла даву кIулшиву, хасну цифровойсса технологияртту. «Школа фермера» – ва бур ттизаманнул кIулшиву дулаврил проект, циву гьуртту шаврийну жула аграрийтураща бюхъантIиссар кIулшиву ва даврил бюхъу лавай бан.
ХIакьину Дагъусттаннал шяраваллил хозяйствалуву буссар технологиялул сакиншинна кIулсса хьхьичIунсса зузалт ва жун ччай бур миннал кIулшивурттая дагъусттаннал фермертурал мюнпат ласун бан. Мунийну жущава бюхъантIиссар жулла республикалул аграриялул потенциал ишла бан республика ва щала билаят дукиялул дузал бан», – увкунни Шарип Шариповлул.
