ХIурмат лавайсса ХIусман-ХIажи Сулайманович!

«Дагъусттан» Москавуллал культуралул центрданул президиумрал цIаниятугу, хасну ттула цIаниятугу дакIнийхтуну барча дуллай ура вил 85 шинал юбилей. ТалихIиндаран, Да­гъусттан бюхттулсса, бювхъусса инсантурал чулуха тIайлабацIу бусса билаят бур. Вил цIа Аьра­сатнал ва Дагъусттаннал оьр­му хьхьичIунмай буван ххинугу хъунмасса хIарачат бивхьуминнал, хIакьсса патриотътурал кьюкьлувусса цIар. Вил рувхIанийсса ва профессионал­сса потенциал ватандалул мюхчаншиврул каши-кутак хъунна шаврин, дакьаву дуруччаврин, Москавливгу, Дагъусттаннайгу дусшиву цIакь шаврин хъинну бучIи лявкъуссар. Культуралул центрданул даву гьазгу, дю­хъангу давривугу вил биялсса бутIа буссар, москавуллал да­гъусттанлувтурал дянив вил сийгу дуссар, хIурматгу лавай­ссар. Хаснува кIицI лаган ччива жагьилтал патриот зумуну тарбия баврил ххуллийсса вил даву личIиссава кьиматран лайкьсса душиву. Вил оьрмулул хъунма­сса опыт, вил аькьилшиву ва дакI хъиншиву, чувшиву ва чумартшиву, тIайламур ччишиву ва Дагъусттаннахсса ччаву жагьилтуран эбратранссар.
Ххирасса дус, вингу, вилцириннангу чIа тIий буру цIакьсса цIуллушиву, цIу-цIусса ххари-хъиншивуртту! Ххари буллалу уттиния тинмайгу ина жу, вила оьрмулухсса ччаврийну, шавкьирайну!

Арсен ХIусайнов,
Москавливсса «Дагъусттан» Культуралул центрданул
президент