Март зурул 3-нния 5-ннийн бияннин ЦIуссалакрал райондалул школардай хьунни ЮИД (юные инспектора движения) сакин хьусса кьинилуцIун дархIусса шадлугърал мероприятияртту.

Вай хьунни оьрчIан ххуллий мюхчанну бикIан лахьхьин баву мурадрай дуллалисса мероприятиярттал лагрулий.
Март зурул 6-нний 48 шин бартлаглай дур ЮИД-рал кьюкьри сакин хьуну. Вай кьюкьри сакин даврил агьаммур мурад бур мюрщи оьрчIахь ва балугъравун къабивминнахь ххуллул низамрал тIалавшиннардая ва ми дуручлан аьркиншиврия бусласаву.
ЮИД-рал кьюкьрал даву хъиннура щирикIин даву, цIусса кьюкьри сакин даву, миннувун ххишаласса оьрчIру кIункIу баву мурадрай тIайла дурккун дур ЮИД-рал суккушиннаран хас дурсса ца кьини, итадаркьуну дур «С днем рождения, ЮИД» тIисса открыткартту, дурну дур цаймигу мероприятияртту. ДакIнийн бутан, ххуллурдай балугъравун къабивсса оьрчIру-душру хIаласса ДТП-тту чIяру шаврийн бувну, оьрчIру апатIрая мюхчан баву хIакьинусса кьини школардай ца яла хьхьичI ххуттайн ласун аьркинсса масъала бур. Мюрщи оьрчIан ва балугъравун къабивминнан ххуллул низам лахьхьин даврийну жува мюхчан буллалиссару ххуллурдай миннал цала ва лагма-ялттунал оьрмурду.