Республикалул Халкьуннал творчествалул къатлуву хьунни халкьуннал театрдал режиссертурансса семинар. Муний гьуртту хьунни Ах­ттиял, Бабаюртуллал, Бущихъиял, Гумбетуллал, Лакрал, Ккуллал, ЦIуссалакрал, Лаващиял, РутIуллал, УнцIукIуллал, Хасавюртуллал ва цаймигу районнаясса ва Къизлар, МахIачкъала, Каспийск шагьрурдаясса халкьуннал театрдал режиссертал ва актертал.

Ва ххуллухсса семинар хъунмурчIин хас бувну бия халкьуннал театрду республикалул фестиваллайн хIадур шаврийн, миннул репертуардаву ДАССР сакин хьуну 100 шин шаврин хасъсса постановкартту ххи баврин.

Семинарданул даву дайдихьлай, ДР-лул культуралул министр­нал хъиривчу, Халкьуннал творчествалул къатлул директор Марита МухIадовал кIицI ларгунни ва шинал халкьуннал театрду гьурттуну дуванми давурттавасса агьамми: фольклорданул ва аслий­сса культуралул Дунияллул халкьуннал дянивсса «Горцы» фестивальданий гьур­тту шаву, «Аьда­тирттал театр» ва «Къаяккантливсса каникуллу» тIисса республикалул фестиваллайн, «Ттул Ватан – ттул Аьра­сат» тIисса аслийсса культуралул центрдал агитпрограммар­ттал фестивальданийн хIадур шаву, «Творческий десант» проект щаллу даву.