Хъаннил байран Карашрал къутандалийгу

Лакрал балайчи Гулсарам ХIажимахIаммадова

Интнил цалчинсса хIахIлищал жучIанна дучIай хъаннил байрандалул кьинигу. Му кьини гьарма анавар уккай ниттихъул, ссурвал ва лагма-ялттусса душру-хъами барча бан. Хъаннил байран чIарах дуккан къадиртунни Карашрал шяраваллил бакIчину зузи­сса ХIусайнов Захар Зияуттиннул арсналгу. Ванал сипталийну Бабаюртуллал райондалий Карашрал къутандалийсса Арусси тIисса шяраву хьунни му кьинилуцIун дархIусса диялсса шадлугъ.

Къутандалул чуллай гьаварал тагьар къулайсса дакъанугу, мажлис буллалисса школа-интернатрал къатравун чIявусса инсантал бавтIун бия. Хъами-душру, кIюрххицIунмай бивзун, дукрардаха зий, хIадуршин дуллай, гъирарай тIурщу тIий бия. Дуклаки оьрчIал ххарисса чIурдугу лагма-ялтту чIюхлайнма бия.

Ахттая махъ инсантал батIайхту, байрандалул мажлис тIитIлай, Захар ХIусайновлул барча бувна цинявппагу хъами, чIа увкуна цIуллушиву ва гьарца дуллалимуниву тIайлабацIу. Мукунма махъ лавхъуна ва шадлугъ дан чIарав ацIаву дурсса школа-интернатрал директор ТIагьир Айгуновлул, чанну-ххину бувсуна ва байрандалул тарихраягу.

Байран хъун дан шяраваллил бакIчинащал увкIун ия Карашрал Культуралул къатлул бакIчину цIуну ивтсса, жуна чIявуссаннан кIулсса музыкант-балайчи ХIабиб ХIусайновгу.
Барча бувна цинявппагу-хъами душру шяраву дуллалисса давурттал чIарав мудангу бацIайсса шяравучутуралгу: Батир Оьмаровлул, Мирза ХIусайновлул, МахIаммад Жабраиловлул, Шамсуттин АхIмадовлул, Сабир АхIмадовлул. Махъру лавхъуна лагма-ялттусса къутанная бувкIсса хъамаллуралгу. Лавхъуна махъ БахIикIуллал шяравасса, карашращал гъансса дусшиву дусса Сулай Оьмариевлулгу.

Хъунмасса ка-кумаггу бувну, ва батIаврий гьурттушинна дурна къутандалийсса Культуралул къатлул методист Зенфира МахIаммадовал. Дукралул щаллушинна дуруна Абризат Оьмаровал. Шяраваллил администрациялул ва байрандалийн бавтIминнал чулуха Загьрат ХIажибуттаевахь барчаллагь увкуна Захар ХIусайновлул, шагьрурдая бувкIсса хъамал дакIнийхтуну ичIува кьамулгу бувну, дуллалисса даврицIун кабакьаврихлу.

Байрандалийн бувкIсса лакрал балайчитурал хIадур дурну дия музыкалул программа. Балайрду щаллу бувна Гулсарам ХIажимахIаммадовал, Загьрат ХIажибуттаевал, ХIабиб ХIусайновлул, Аминат Оьмариевал ва мукунма цайминналгу. Шяраваллил инсантал ва хъамал рязину ливчIунни шадлугърая.

А. АхIмадова