Ва шинал ахирданийннин Аьрасатнал циняр регионнай щурущи дувантIиссар «Госуслуги. Решаем вместе» тIисса цIусса платформа. Ванил кумаграйну бюхъантIиссар цалва-цалва мурадирттай бувкIсса агьалинащал дахIаву дуну зун. ХIасил, хIукуматрал хIаллихшиннарду аьркинну бувкIсса агьалинал мурад биттур бувну бурив-бакъарив ххал бан, хъирив лаян ва ялув бацIан.
Билаятрал регионнаясса информатизациялул аралул жаваблувсса каялувчиталгу гьурттусса агьамсса батIаврий АьФ-лул вице-премьер Дмитрий Чернышенкогу кIицI буллай ур ва давриву хъунмур чIурчIав дувантIишиву госуслугардал хъирив бувкIни, агьалинал мурадру биттур бувну бушиврий инсан рязину даву сакин даврих.
БатIаврий гьуртту хьусса ДР-лул цифровизациялул лябуккулул министр Сергей Снегиревлул бусаврийну, электрон журалий хIукуматрал хIаллихшиннарду щаллу дуллалавриву Аьрасатнаву Дагъусттан бусса бур 12-мур кIанай. «Госуслуги» порталданий регистрация дурну дур хIакьинусса кьини сайки 2 миллиондалийн бивсса агьалинал. Ца зурул дянив му порталданийн уххайсса ур 250 азараксса инсан.
2020 шинал «Госуслуги. Решаем вместе» тIисса платформа ишла дурссар цалчин федерал къуллугъирттай. Утти тIурча, ванил кумаграйну агьалинаща бюхъайссар, COVID-19-рал вакцина бан ччай бухьурча, регистрация дангу, «Анавар кумаграл» машина къабукIлай бухьурча, аьркинсса кIанайн баян бувну, масъала щаллу бан ва цайми-цайми захIматшивурттая баян бангу. Ва сервисрал кумаграйну, масалдаран, Минпросвещениялулгу нитти-буттахьхьун суаллу буллуну, щаллу бан бювхъуну бур оьрчIан гъилисса дукра дуллай бурив-бакъарив ххал буллалисса масъалагу.
