АцIния кIива оьрчIал нину
Жула оьрмулуву агьамсса кIантту бувгьусса инсантал, ми дунияллий бакъанугу, тачIав дакIния къабуккайссар ва гьарица бивзсса шаттирахун жущалва архIал буссар, хаснува жула нину-ппу.
Кьянатсса дяъвилул шиннардий 12 оьрчI хъунигу бувну, чивун буккан бувну бур Ваччиял шяравасса Асадуллагьлул ва Жавагьи Маккуевхъал. Дяъви байбивхьусса шинал Асадуллагьлун диркIун дур 36 шин. Хушрай аьрайн цалчин наниминнавух Асадуллагьгу лавгун ивкIун ур цувагу уцара тIий. Райондалул шяраваллил советрай каялувшиву дансса инсан акъашиврийн бувну, Асадуллагь военкоматрая махъунай зана ивтун ивкIун ур.
Вайннал кулпатраву дяъви байбишиннин бивкIун бур ряхва оьрчI. Хъунма-хъунмур душ бувну бур 1930 шинал. «Цимурца дяъвилун кумагран, ххувшаву ласаврил цIаний» тIисса, тарап дургьусса тай шиннардийсса чIунну, гьай-гьай, вайннал кулпатрангу бигьасса къадиркIун дур. Танийсса цинявппа инсантурал кунма, кулпатрал агьаммур дуланмагъгу диркIун дур ятту-гъаттара ябаврийнусса, хъу-лухччив зузи даврийнусса. БивкIссар кулпатру ябансса ризкьи-кьини, дугьансса хъу-лухччив дакъассагу.
– Кьянатсса шартIирдай оьрму бутлай бивкIсса жула нину-ппу ттун вирттавраха лащай, – тIий, тай чIунну дакIнийн дичлай, буслай ур вайннал арс МахIаммад-ХIажи Маккуев. Машгьурсса педагог хIисаврай ва кIулссар чIявуссаннан.
– Жул кулпатравусса оьрчIал ва нитти-буттал дянивсса нахIу-хIалимсса арарду жуннагу, цайминнангу эбратрансса дикIайва. ЧIявусса оьрчIру бусса кулпатирттаву кунма, жул ниттингу, жу ччаннай бацIан баншиврул хъуннасса хъар лахъан багьссар. Буттагу мудан даврил къайгъурду хьхьичIун лавсъсса инсан икIайва, пенсиялийн укканцIа цалагу отпуск ларсун, игьалавгсса чIун дакIний дакъар. Дяъвилул шиннардий хъиннува захIматну бикIайва кулпат дуки-хIачIиялул, лаххи-ликкиялул дузал бан. Дяъви байбивхьусса шинал хъунмур ссин Зубайдатлун дурагу 10 шин дия, чIанма-чIивимур ссин ца шин дия. Дяъвилул шиннардий увссара нагу, ттуяр чIивимур ссугу. Я ниттил, я буттал ичIурасса давуртту хъаннил ягу арамтуралли къаувкуну, личIишиву дакъа, бавкьуну дуллан бикIайва. Бутта чIярумур чIумал давурттайх кьатIушав икIайва, мунияту хъунмурчIин оьрчIру тарбия баву ниттихун багьайва, – буслай ур МахIаммад-ХIажи.
Гьарицагу инсаннал оьрмулуву яла агьаммур кIану бугьлай бур ниттил. Жавагьи ляличIисса хъамитайпа бивкIун бур. Цуксса сахаватлувсса хъамитайпа бухьунссия, тай захIматсса дяъвилул шиннардий цилвагу хъунмасса кулпат бунува, нину-ппу бакъа баябалну ливчIсса душ бувцуну, хъунмагу бувну, щар буллуну бивкIун бур ванил. Совет заманнай ахIвал-хIал кIюласса, чIявусса оьрчIру бусса кулпатирттавасса оьрчIан тIивтIусса интернатирттай дуклай бивкIссар Маккуевхъал кулпатрава ххюва оьрчI. Вайннава ацIуннал ларайсса даражалул кIулшиву ларсун дур. ХIакьинусса кьинигу зий бур личIи-личIисса бусравсса давурттай.
[dropcap]З[/dropcap]умратлул къуртал бувну бур Москавлив Культуралул институт. Саманият тIимур душ, Дагъусттаннал мединститутгу къуртал бувну, 45-нния лирчусса шиннардий зий бивкIун бур МахIачкъалаллал Муххал ххуллул азарханалий. Рамазан, Мединститутгу къуртал бувну, ккарччал хIакинну медучилищалуву дарсру дихьлай ивкIун ур. Макьусудлул ва МахIаммад-ХIажинал къуртал бувну бур Дагъусттаннал паччахIлугърал университет. Макьсуд зий ивкIун ур Къизилюртуллал райондалийсса школарттай, яла 40-нния лирчусса шиннардий дарсру дихьлай ивкIун ур Дагъусттаннал медакадемиялуву. Дагъусттаннал лайкь хьусса учитель, АьФ-лул кIулшивуртту дулаврил министерствалул отличник МахIаммад-ХIажи Маккуевлул Дагъусттаннай ца яла хъунмамунин ккаллисса 22-мур лицейрал директоршиву дуллай хьуну дур 30-хъул шинну. Хъунмасса коллектив ва чIявусса дуклаки оьрчIру бусса школалий ванал хIарачатрайну, анаварсса чIумул мутталий даву нирхиравун руртун, шанма сменалий дасру дихьлай бивкIсса школа ца сменалийнгу бувтун, 5 кьини дарсру дишай бувну, учительтурангу, дуклаки оьрчIангу хъуннасса бигьашиву дурну диркIссар. ЦIанасса чIумалгу МахIаммад-ХIажи ур Республикалул ветерантурал советрал ва педагогтурал насихIатчитурал председательну.
1953 шинал СССР-данул Верховный Советрал Президиумрал хIукмулийн бувну, вайннал ниттин, Жавагьин дуллуну дур «Нину-Виричу» тIисса цIа. Ккуллал райондалий ва бюхттулсса наградалун Жавагьи лайкь хьуну бур цалчин.
Кулпатраву ниттил ва буттал бивзсса тарбиялул гьанугу цIакьсса шай. ХIакьинусса кьинигу вайннал щалва агьлу-авладран кувннал кувннащалсса арардугу дур, цала нитти-буттал аманат бувсса куццуй, дакI цIимилийсса ва аякьалийсса.
Ппу Асадуллагь тамансса шиннардий зий ивкIссар Ваччиял шяраваллил сельсоветрал председательну, Ккуллал райондалул председательну. Мукуна ва зий ивкIссар бухгалтерну, экономистну ва Сталиннул цIанийсса «Конституция» тIисса артельданул хъунама бухгалтерну.
Шиккува кIицI лаган, цала уздансса тухумрал тарих ва мархри хIура-буккан къабитаврил хъар цала бакIрайн ларсун ур Асадуллагьлул арс МахIаммад-ХIажи Маккуевлул. Ччя-ччяни ца супралухун гъанчутал батIайсса, ххаллилсса аьдатгу дачин дурну дур.
МахIаммад-ХIажинал сакин дурну дур Маккуевхъал авладрал арулла никирайсса тухумрал нясавгу.
