[dropcap]Ф[/dropcap]евраль зурул ахирданий Каспийскалий хьусса Дагъусттаннал армрестлинграл чемпионатрай кIирагу ка дирхьуну ххув хьуну, шамилчингу Дагъусттаннал чемпионнал цIа ларсъсса Бахтияр ХIамзатовлуя жу хьхьичIмур номерданий чивчуссия (№10).
Вай гьантрай «Инт» этно-кафелуву цала шяравучу лахъа-хъун ан бавтIун бия Ккурккуллал жямат. «Ккурккуллал ккурчIа» ккурандалул сипталий ва сакиншиннарай шикку хьунни чемпионнан хас бувсса ххаллилсса шадлугърал мажлис.
Ккурандалул чулуха Бахтиярдун дуллунни ХIурматрал грамота ва чIири-хъунсса бахшиш. Мажлис бачин бувну ия Шамил Магьдиев.
Спортсмен барча уллалисса ихтилатру бунни «Илчи» кказитрал зузала Андриана Аьбдуллаевал, «Ккурккуллал ккурчIа» ккурандалул администратор Анжелика Абачараевал, чемпионнал преподаватель (Каспийскаллал Промышленно-энергетический колледж) Мадина Абачараевал, Анжелла Аьлиевал ва м.ц. Ккурандалул бахшишрацIун цила чулухагу бахшиш дунни Тамила Магьдиевал.
Цинявппагу ихтилатчитурал кIицI ларгунни, Бахтиярдул спортрал ххуллийсса ххувшавуртту дакъассагу, ванал мяърипат, цилалу 8 оьрчI хъуни буллалисса ниттихасса аякьа, хъунаначIансса хIурмат.
Цинявннал цIания Бахтиярдухь Аьрасатнал чемпионатрай тIайлабацIу чIа кунни ЯхIия ва Сияна ХIажиевхъал.
Чемпионнан хас бувсса балай увкунни «Инт» этно-кафелул зузала, балай учаврил гьунар бусса ПатIимат Жабраиловал. Жул мажлис хъиннува чIюлу бан хIарачат буллай бия кафелул хъунмур Саида Кьурбановагу.
Цинявннал Бахтияр дянив уккан увну, мунал савлугъран къавтIаву дунни. Ахирданий спортсменнал барчаллагь увкунни цува лахъа-хъун ан бавтIминнахь.
– На хIарачат банна цIу-цIусса ххувшавурттайну ттиния тихунмайгу зу ххари буллан, – увкунни ванал.
Ца-кIива гьантлува чемпион лахъа-хъун уллалисса мажлис хьунни Ккурккуллал шяравугу.
Мероприятие хIадур дурну дия шяравусса Культуралул центрданул филиалданул ва шяраваллил библиотекалул зузалтрал.
