Муштаритурал ихтиярдал кьинилул хьунийн Дагъусттаннайсса Роспотребнадзорданул ва ДР-лул Гигиеналул ва эпидемиологиялул центрданул пишакартурал шагьрурдайсса ва районнайсса МФЦ-рдайн бувкIсса агьалинащал дурунни маслихIат-насихIатру буллалисса хьунабакьавуртту.
Шикку, ттучаннай, салоннаву ва цаймигу кIанттурдай муштаритурал ихтиярду лиян дурсса иширттахун багьминнах вичIигу дирхьуну, Управлениялул ва Центрданул пишакартурал бувсунни цуми иширттаву даххулт къатIайлассарив ягу муштаритурахь ци бансса ихтиярду дуссарив.
Агьалинал аьрзардах вичIидирхьуну махъ, пишакартурал муштаритурал ихтиярду лиян дурсса иширттал сияхI дурну дур. Му сияхIрайн бувну, ихтиярду лиян дурсса иширттаву яла чIявуну, ччя-ччяни мукунсса ишру шайшиву ккаккан бувну бур дахху-ласулул аралуву. ХъунмурчIин чIун дурксса, лахъи ларгсса дуки-хIачIия ларсни, ттучаннай ми махъуннай къаласлай ягу даххана къадувайсса ишру шайсса бур. Бур ишру хъус ларсни, ттучаннаву чек муштаритурал канихьхьун къадулайссагу, бур мукунма ишру кьутIирду лиян дурссагу, салоннаву муштаритурал дакIру къадакьинну хIаллихшинна дурссагу.
КIилчинмур кIанай бур ЖКХ-лул аралийн багьайсса аьрзри ва рязибакъашивуртту. ХъунмурчIин хIачIан къашайсса щиная къарязисса, чани лешлай-лахълай азурда буллалишивриясса, кIирисса щин багьайсса куццуй къадуллалишивриясса ва цаймигу.
Шамилчинмур кIанай бур медициналул хIаллихшиннардая къарязисса. ХIасил, аьрзри бур косметологиялул салоннаву ва стоматологиялул поликлиникардай ихтиярду лиян дуршиврия бусласисса.
Вай иширттахун багьминнахь Управлениялул ва Центрданул пишакартурал маслихIат бувунни хIаллихшиннарду дурсса пишакартал арцу зана дан ягу лахъи ларгсса дуки-хIачIия даххана дан рязи къахьурча, мугьлат бакъа Роспотребнадзорданийн аьрза чичин.
Укунсса журалул захIматшивурттахун багьни, халкьуннан цалла ихтиярду кIулну дикIаншиврул ва миннул хъирив букканшиврул пишакартурал бувсунни цала сайтирдай ва социал сетирдай ккаккан бувну бушиву аьрза, рязибакъашиву ягу ихтиярдал актру чичин аьркинсса куц.
Роспотребнадзорданул цуя-ца инсаннал аьрзлух къулагъас къадурну къабитайссар, аьркинну бухьурча, судрахун багьаннин хъирив буккайссар.
