Март зурул 10-нний МахIачкъалалив хьусса, республикалийсса медициналул тагьарданийн багьайсса масъалартту ххал бигьлагьисса элмийсса форумрай цIуллу-сагъшиву дуруччаврил министр Татьяна Беляевал бувсунни балжийну 2021-2015 шиннардий республикалий медицина лавайсса даражалийн гьаз дувансса мяълумсса программалия.
Ванил кIицI лавгунни Минздраврал хьхьичIун лавсъсса масъалартту сантирай ва лябуккулий бартбигьиншиврул уртакьну зун багьлай бушиву Строительствалул, Транспортрал ва Промышленностьрал министерствардащалгу, минналмур бюхъу-тяхъалиягу хъар хъанай душиву дуллалисса даврил хъитгу, бущигу. Бувсунни кIани-кIанттурдайсса муниципалитетирттал каялувчитурал кабакьавугу аьркинну душиву. Гьаннайсса, министерствалуща цащавалу дузал буван шайсса масъалартту бакъашиву.
«Гьашину медициналул модернизациялул ххуллий бартдигьинтIисса национал проектрай бацIан ччива. ХьхьичIва-хьхьичI, цIусса 54 объект бувансса ният дуссар, миннуву ФАП-ру, хIакинтурал амбулаториярду бикIантIиссар. Цивппагу гьармунил дузалсса, уттизаманнул тIалавшиннардал тIийкунсса. Мукунма цIусса транспорт ва ххуйсса оборудование машан ласунсса пикри бур, МахIачкъалаливгу кIива цIусса поликлиника буван багьлай бур», – увкунни Минздраврал хъунмунил. Ванил кIицI лавгунни «Здравоохранение» проект бартдигьаву мурадрай уттинингу хъуни-хъунисса давуртту дуршиву, 50 ФАП бугу-бувну, гьармунилгу дузал бувшиву республикалий, 55 медициналул мобил комплексру машан лавсшиву. Бувсунни ларгсса кIира шинал мутталий Дагъусттаннал Сосудирттал центрданийнгу цIусса, ххуйсса оборудование дуркIшиву, сайки циняв оьрчIансса поликлиникартту аьркинмунил дузал бувшиву. 2020 шинал ОьрчIансса республикалул азарханалийн бувкIун бур кIива МРТ дай аппарат ва кIива КТ дувай аппарат. Му бакъассагу, «Земский доктор» программалул лагрулий шяраваллил кIанттурдай 1485 хIакиннансса ва 35 фельдшернансса зузи кIантту бувну бур. Гьашинугу 170 хIакиннансса ва 13 фельдшернансса зузи кIантту бувансса мурад бур. Татьяна Беляевал бувсунни медициналул туризмгу хIаллицIух хьхьичIуннай хъанай душиву ва онкологиялул азарданул къашавайминнахгу къулагъас хъун дуршиву. Ванил бувсмунийн бувну, 2019-2020 шинал лажиндарай республикалул онкоцентрданийн дуркIун дур ххуйсса медициналул техника, 143 оборудование, миннувух лучевая терапия дувайсса кьиматрайсса аппаратругу. Бувну бур ца сменалий 200 инсан кьамул увайсса цIусса поликлиникалул корпусгу. «Дурсса давурттугу чIярур, дуллантIимигу чIярур. Сантирай ва лябукку буну медицина хьхьичIуннай дуваншиврул, щиривкIуну зунтIиссару, зийгу буссару», – увкунни ванил.
