ЦIумадиял райондалийсса Хушет шяраву ялапар хъанахъисса 29 шинавусса Пайнусат Жамалуттинова ,оьрчI бан захIмат хъанай, ФСБ-лул дазул къуллугърал вертолетрай биян бувну бур Хъунзахъиял райондалул азарханалийн.
Пайнусат ялапар хъанай бур Гуржиял дазуй дирхьусса Дагъусттаннал ца яла архмур шяраву. Шиккун бахьтта, ягу балчаннуй бакъа гьан къашайсса бур. Ххуллу бакъашивруцIун, бувсса марххалтталгу хъиннура захIматшивуртту дунни медициналул зузалтран. Хъамитайпа санитар авиациялул вертолетрай буцинссагу тагьар къадиркIун дур, тIабиаьтрал шартIру вертолет леххансса дакъа, муницIунна цIансса чIунгу дуну. Тагьар чIалай, Дагъусттаннал цIуллу-сагъшиву дуруччаврил министрнал кIанайсса Татьяна Беляева Республикалул БакIчи Сергей Меликовлуйн бувккун бур. ОьрчI буллалисса хъамитайпа буцин лерххун дур кIицI ларгсса шартIирдай леххан шайсса ФСБ-лул дазул къуллугърал вертолет. Вертолетрай хъамитайпалух ялугьлай бия медициналул зузалтрал бригада: акушер-гинеколог, анестезиолог-реаниматолог ва медициналул сестра. Вертолетрай хъамитайпа биян бувну бур Хъунзахъиял райондалул азарханалийн. АцIра минутрава ванил увну ур цIуллу-сагъсса, 3 кило ва 340 гр. дусса арс.
ОьрчIгу, нинугу цIуллуну, сагъну бур. Чансса хIаллава вай шаппай итабакьин тIий бур.
