Аьрасатнал Федерал собраниялул Федерациялул Советрал 500-мур батIаврил ХIукуматрал ссятрай махъ лахълай, культуралул министр Ольга Любимовал регионнай миллатрал проект «Культура» щурущи баврил ялувсса цила докладраву эбратран бивхьунни Дагъусттан, цувгу вай гьантрай субъектирттал аьдатсса кьинирдал лагрулий Федерациялул Советрай ккаккан бувсса.

Министрнал кIицI лавгунни республикалул театрал магьирлугърал аваданшиву ва цумурцагу этносрал аьдатру дуруччаврил цIаний дуллалисса даву.
«Региондалий зий бур 12 паччахIлугърал ва 30-нния ливчусса халкьуннал театрду. Миннувасса 8 зий бур миллатирттал мазурдий. Шикку кьиматрай дуручлай бур цумурцагу этносрал аьдатру.
Ларгсса шинал «Культура» миллатрал проект щурущи баврил лагрулий МахIачкъалалив байбивхьунни буллай жула билаятрал яла цIанихми къавтIаврил коллективирдавасса цаннин ккаллисса «Лезгинка» ансамбльданунсса КъавтIаврил къатта», – увкунни Ольга Любимовал ва барчаллагь увкунни чIумуйну республикалул бакIчинал буржру биттур буллалисса Сергей Меликовлухь региондалул маданиятрах хасъсса къулагъас душиврухлу.