ЦIуссалакрал райондалул бакIчи МахIаммад-ХIажи Айдиев, райондалул виваллил иширттал отделданул хъунама АхIмад Щайховлущал ва подразделениярттал каялувчитуращал ивунни «Герзеллал ламу» ФКПП-райн ва 103-мур КПП- лийн. Вай бувкIун бия Дагъусттаннал ва Чачаннал дазуй къуллугъ буллалисса аьралитурахь Ватан дуруччултрал кьини барча дан.

Райондалул бакIчинал барчаллагь увкунни аьралитурахь цала къуллугърал буржру дакI марцIну бартбигьаврихлу. Аьралитуран администрациялул чулуха дуллунни ХIурматрал грамотартту.
КIицI лаган, Костромаллал ва Пермьрал полициялул сводный отряд ЦIуссалакрал райондалий къуллугъ буллай цалчин­сса шин дакъар. Вай нукIува бу­ссар Дагъусттаннал ва Чачаннал дазуй мюхчаншиву дуручлай. ДакIнийн бутан, 2018-ку шинал дайдихьулий Костромаллал областьрал ва ЦIуссалакрал райондалул бакIчитурал уссушиврий­сса дахIавуртту дансса кьутIи дурну диркIссар. Костромаллал областьрал губернатор Сергей Ситников цимилгу увкIссар Ух­ссавнил Ккавкказуллал региондалий къуллугъ буллалисса цала аьралитурачIан иян.
Шикку къуллугъ буллалиминнаву бур оператив подразделениярттал, патрульно- постовой къуллугърал зузалт, участковыйтал, кинологтал, ДПС-рал инспектортал. Мукунма шикку къуллугъ буллай бур Росгвардиялул зузалтгу.