Дагъусттаннал ихIсаниятрал фондирттал «РахIму-цIимилул дустал» тIисса ассоциациялул, мунил директор, жула лакку оьрчI Аьбдулла Аьлиевлул сипталийну, мартрал 13-нний МахIачкъалалив хьунни Дагъусттаннал шяраваллал фондирттал батIаву.
Микку дурунни ларгсса шинал хIасиллу, гьашину дуванминнул планнугу ххал диргьунни. Ялагу ва хьунабакьаврил сиптачитурал мурад бия ми фондирттал вакилтал куннащал кув кIул баву.
Дагъусттаннал шяраваллал фондирттал дянив чIяруми лакралсса дур: 1545 шяравалу дусса республикалий 51 шяраваллил фонд дур, миннувугу лакрал шяраваллал – 29 фонд. Лакралми фондру цачIун хьуну дур Лакрал организациярттал ассоциациялуву.
Аьбдулла Аьлиевлул социолог хIисаврай Дагъусттаннал 39 фондрал хъиривлаяву дурну дур, ялун личин дурну дур фондирттан хьунадакьлакьисса захIматшивуртту, миннул хьхьичI бивхьусса масъалартту. ЛичIину лакралми фондирттал хъиривлаявуртту ванал цалсса дурну дакъар.
Вайннал хIарачат буллай бур шяраваллавусса социал (даву дакъашиврул, кIулшивурттал, медициналул ва м.ц.) ва инфраструктуралул (щинал, ччюрклил, ххуллурдал, аьрщарал, газрал, электричествалул, канализациялул ва м.ц.) масъалартту щаллу буван.
ХIакьинусса кьини Фонд – му хъанай дур бувагу бусса ца социал институт, цилгу шяраваллурду хьхьичIуннай даврил бущи анавар буллалисса, шяраваллурду экономикалул депрессиялува дукканмур буллалисса.
