Тталаткьини, март зурул 9-нний, хьунни ЦIуссалакрал райондалул агьали цIусса миналийн бизан баврил масъаларттал хIакъиравусса совещание. Му дачин дурну ия ДР-лул ХIукуматрал председатель АьвдулпаттахI Амирханов.

Премьер-министрнал тапшур бунни хасъсса министерстварттал каялувчитурайн цаннал хъирив ца вай масъалартту щаллу буллан. «Щаллу бан багьлагьисса масъалартту чIявусса бур, чIявуну лешлай бур чани, хъанай дур газ бакъасса чIунну, щаллу бувну бакъар канализациялул масъала. Бизан баврил масъала лахъи лавгун бур сайки 30 шинай. Багьайсса хIукмурду кьамул бувну, масъала анавар буккан бан багьлай бур», – увкунни ванал.
Бизан баврил масъалар­ттацIун дархIусса паччахIлугърал программа цукун щаллу дуллай, ссайн бивну буссарив бусласисса ихтилат бунни ДР-лул ХIукуматрал лак цIусса миналийн бизан баврил ва Аухуллал район цIудуккан даврил Управлениялул хъунама ХIажи Султановлул. Цала ихтилатраву ванал кIицI лавгунни ца яла хьхьичI ххуттайн ласун багьлагьимур масъала цIу миналийсса шяраваллу токрал дузал даву бушиву.

Ва масъала дузрайн букканшиврул Шамхаллайсса подстанциялия ЦIуссалакрал шяравун бияннин хъунмасса гуж бусса (высоковольтные) токрал ххаллу дуцин багьлай бушиву, мукунма бан аьркинну бушиву шяраваллавун ток буцинсса цIусса подстанция.
Вай давурттан чIярусса арцу аьркин дагьлай душиврийн бувну, Дагъусттаннал Энергетикалул министерствалийн тапшур бувну бур «Россети» ПАО-лущал вай давурттан арцу итадакьаврил масъала ххалбигьин.

Цамургу хъуннасса агьамшиву дусса масъала бур гъарал щин дачинсса канализация даву. Ва дакъашиврийн бувну шяраваллаву щин ялтту ларгсса ва миннул ххуллурду зия бувсса ишру хъанай бур. Мукунсса иш хьуну бур нанисса шинал дайдихьулийгу.
ЦIуссаккуллал шяраву ва лагмасса кIанттурдай ялтту ларгсса щин дукьан дан, ми экьи нансса каналлу марцIгу дурну, цIудуккан дансса чаран ляхълай, Дагъусттаннал ХIукуматрал резерврал фондрая итадаркьуну дур 11 миллион арцул. Совещаниялий цал ттигу кIицI лавгунни Федерациялул Советрай Дагъусттаннал Кьинирду нани­сса чIумал гьаз бувну бивкIсса ххуллурду бакьин баврил масъала. Ва масъала щаллу бан 3,5 миллиардрая ливчусса арцу аьркинну дур. ХIисав дуркун, аьмну гъарал щин дачинсса канализация дан ва цаппара щинал ххуллурду бакьин бан 8 миллиардрая лирчусса арцу аьркин хьун най дур.

АьбдулпаттахI Амирхановлул тапшур бунни ххуллурду бакьин бан ва шяраваллу ххуй дансса давурттал проектно-сметная документация хIадур дан ва ми инвестициярдал адресный федерал программалувун дутансса аьрза чичин.
Совещаниялул лагрулий мукунма ххал бивгьунни коммунал ва инженер инфраструктуралул агьалинансса, къуртал къадурсса къатрал масъалартту. Гьарица масъала хасъсса министерстварттайн ва ведомстварттайн тапшур бунни.