[dropcap]М[/dropcap]артрал 10-нний МахIачкъалаллал Дусшиврул къатраву байбивхьунни элмийсса форум «Дагъусттаннал медицина: вызовру ва тадвирду». Мунил планер батIаврий гьуртту хьунни Дагъусттаннал БакIчи Сергей Меликов. Форумрал тема дур «Национал проект «ЦIуллушиву дуруччаву» – цIушиннардачIансса медициналул ххуллу».
Форум тIитIлай, ДГМУ-лул ректор Сулайман Маммаевлул бувсунни форум буллай бушиву ДР-лул БакIчинал сипталийну. Мунал тIимунийну,Программалувун бухлай бур 17 секция, 3 ккуркки стол, аьмну лавсун микку буккинтIий бур 92 доклад.
Сергей Меликовлул барчаллагь кунни циняв бавтIминнахь, хаснува Москавлия ва цайми регионная бувкIминнахь, форумрай гьуртту шаврихлу.
«Гьалбатта, ччай бур личIину барчаллагь учин Аьрасатнал ЦIуллушиву дуруччаврил министерствалухь Дагъусттаннал медициналух хъуннасса къулагъас даврихлу. ДукIу пандемиялул тагьардануву хьусса чIумал жун мукунсса кумаг ляличIину аьркинну бия», – кунни республикалул каялувчинал.
Сергей Меликовлул хъунмасса кьимат бивщунни Дагъусттаннал хIакинтурал дурсса давурттан.
Дагъусттаннал БакIчинал бувсунни мукунма пандемиялул чIумал ялун лирчусса захIматшивурттал хIакъиравугу. Миннувасса ца хъанай дур республикалий медициналул зузалт биялну бакъашиву. Сергей Меликовлул тIимунийну, Дагъусттаннай бартдигьлай бур программа «Земский доктор», мунил лагрулий Дагъусттаннай давурттал дузал увну ур 1485 хIакин ва 35 фельдшер, дукIу — 181 хIакин ва 25 фельдшер. Амма ми къагьану бур.
Пленар батIаврий Дагъусттаннал БакIчинал бувсунни агьамми масъаларттавасса ца хъанахъишиву цIуллушиву дуруччаврил системалуву цIусса технологияртту ва цифровизация ишла дуллалаву.
Сергей Меликовлул кIицI дунни хъинчулийсса дахханашивурттугу. «ЦIуллушиву дуруччаву» тIисса нацпроект бартдигьаврил лагрулий районнайн ва шяраваллавун бучIан бувну бур 55 медициналул мобил комплекс ва бувну бур 20 ФАП. ДукIу лавсун бур75 анаварсса кумаграл машинартту. ХIукму хьуну бур Дагъусттаннай буван ттизаманнул Онкологиялул центр, га бацIантIий бур 14 млрд къурушран.
Яла бавтIми ца минутIрайсса пахъ багьунни коронавирусращалсса талатавриву жанну дуллусса Дагъусттаннал медиктурал хIурмат буван.
