Лавгсса бигьалагай гьантрай «Россия 24» каналданий шамилла ккаккан дурунни журналист Ольга Курлаевал хасъсса репортаж «Год с короной» тIисса. Муниву бувсун бия коронавирусрал пандемия дайдирхьуния шинмай «ятIул зоналий» зузисса ­Аьрасатнал хIакинтурая.

Гьарза-гьартану кка­ккан дурну дия Дагъусттаннал хIа­кинтурал давугу.
Диялсса сюжет дуллуну дия пандемия дайдирхьуния хIакьинусса кьининийн коронавирусрал цIуцIаврищал талати­сса Дагъусттаннал катастрофардал медициналул центрданул жагьилсса хIакин Давид Учуевлуясса ва ванал кулпатраясса.
Учин бюхъанссар, Дагъус­ттаннал катастрофардал медециналул центрданий зузисса шама жагьилнай дарцIуну дия щалла пандемиялул чIумал республикалул санавиация куну. Борт- хирургтал: Давид Учуев ва АхIмад Исядибиров, оьрчIал реаниматолог Арсен Шалбузов. Шамагу архIал лехлай бия вертолетрай архсса зунттавун, захIматсса къашайшалт республикалул ковид-центрдайн биян буллай.

Давид гьурттусса ковидрал бригадалул дурну дур 185 леххаву. Районная ва шагьрурдая агьаммур Ковид-центрданийн сагъну иян увну ур 265 захIматсса къашайшала. Миннава 28 оьрчI.
Давидлуя «Илчилул» буккултран бавссар, кIулссар, жу ваная уттинингу биялсса бусарду.
Ххи банну так сюжетраву Давидлул кулпатрал Сижаратлул бувсмур.

Дагъусттаннай пандемиялул щатIи бищавривун лавгун ур Давид «ятIул зоналий» зун. Центрданийва яхъанай хьуну бур цаппарасса барзру. ХIатта коронавирусрал цIуцIаву цайнна дирсса ппурттувугума леххаву кьакъариртун дур, лавмартсса азарданул ххяппухьхьун биривсса инсантурал оьрму цала кIунттихь бушиву кIулну. Жуна ва цалчин телевизорданувух ккавкссагу, гьамин, цува къашавайсса чIумалъя, захIматсса къашайшала райондалия бувцуну увкIун. Интервью дуллалийни гъалгъа тIун захIматну ия.
«Барзру хьуссар Давид янин ххал къавхьуну, телефондалувух ца-кIира калима данссарагу мажал къабиривну гьантри лагайва. Ттухь бувсса кьини барча дан, шавай уххансса чIунмур цукуннугу дарцуну дия. УвкIуна хъункIултIутIал кацIлищал, амма хIаятравунагу къаувххун лавгуна. НигьачIий ия ттуйн ва душнийн вирус къалахъан. Ккаккавриягума ххарину, Аллагьнайн щукрулий буссияв. Навагу, кIира шинавусса душгу бувцуну, лавгссияв Буйнакскалийн нитти-буттачIан.

Ссавний вертолетрал, самолетрал чIу хьутари Аьйшат хIаятравун лечайва, кIаний бу­тта уссар тIий, кару кIутIу дуллан бикIайва. Жул хъуниминнал ихтилатирттава ванин бувчIлай бия бутта лавмартсса цIуцIаврищал талай, инсантурал оьрмурду ххассал буллай ушиву. Пандемиялул цалчин­сса щатIи бухлаганнинма байбивхьуна кIилчинмур щатIи. Мунийгу жу арснащал роддомрая буцинсса лахIза цукуннугу биривну бия.
ХIакьинугу, пандемия духлаглай духьурчагу, Давидлулмур даву чан хьун дурар. Командировкартту чIярур. Вана лахьхьу левххунни Къарачай-Чаргаснаву ххуллий апатI хьуну, захIматсса цIунцIияртту дир­сса кIия жагьилсса дагъус­ттанчу МахIачкъалалив уцин. Няракъатлун цIунцIия хьуну, кIиягу нейрореанимациялий уттуишин увну ур. ОьрчIругу бизар хъанай бур, бутта къаккаклай. Амма ттун цимурца бувчIлай бур, пиша укунсса бур», – тIий бур Сижарат. Ва цуппагу хIакин бур, терапевт- кардиолог. ЦIанакул бур Да­гъусттаннал Кардиологиялул ва къюкIлил туннурдал центрданий ординатура лахьлай.
Кабакьиннав Заннал Да­видлуцIун вай бигьа дакъа­сса шартIирдаву захIматсса къашайшалт ххассал буллан. Кулпатраву нахIу-хIалимшиву чан къахьуннав!