Мартрал 4-5-нний МахIачкъалалив хьунни агьали бигьалагай кIанттурдал ва кIулшивуртту дулаврил идарарттал чIалачIин ххуй дансса мурадрай баян бувсса архитектуралул щалва Аьрасатнал даражалийсса конкурсрал хIасиллу дуллалисса жюрилул батIаву.

Хасъсса экспертътурал ххалдиргьуну дур 2 номинациялийнсса 18 концепция. Агьали бигьалаган, щябикIансса кIанттурду бакьин бантIиссар МахIачкъалалив, Буйнакскалий, Дарбантлив ва Каспийскалий. Бакьин бантIиссар мукунма цаппара районнайсса школартту ва оьрчIансса садикругу. Конкурсрай ххув хьуну дур цал архIал архитектортурал 6 команда.

Вайннувух бур, хьхьичIвагу «Илчилий» гьарта-гьарзану чивчуну бивкIсса, жагьилсса, гьунар бусса ва хъунна­сса перспектива дусса архитектортураву ца яла хьхьичIунминнавухсса жула лаккучу Камил ЦIунтIаевлул студиягу. Конкурсрал «Агьали бигьалагансса кIанттурду» тIисса номинациялий МахIачкъалаливсса «Лунный берег» тIисса хьхьирил зуманицIсса кIану цIулаган бан ххал диргьусса концепциярттавух Камил ЦIунтIаевлул студия лайкь хьуну бур 3-мур кIанттун. Дарбантливсса бярницI бансса паркрал ва Буйнакскалийсса шагьрулул багърал хIакъиравусса концепциярттавух ва студия лайкь хьуну бур 1-ми кIанттурдан. 18 концепция язи дургьусса конкурсрай ва хъуннасса ххаришиврун ккалли бансса ишри. Конкурсрай ххув хьуминнавух дур Москавлиясса ва Санкт-Петербурграясса архитектортурал командарттугу.

Цуппа конкурс баян бувсса чIумал, ваний гьуртту хьун бувкIун бивкIссар 8 хIукуматраясса ва дунияллул личIи-личIисса 22 шагьрулиясса 72 аьрза. Дагъусттаннал шагьрурдал майданну, кучарду, хьхьирицIухсса паркру, школартту ва оьрчIансса багъирдал чIалачIин ххуй дан кьаст лархIусса архитектортал бивкIун бур, Нью-Йоркрая тIайла хьуну ,Киота тIисса шагьрулийн бияннин. Ларгмур шинал декабрьданул ахирданий бувсса конкурсрал хIасиллай язи дургьуссар 18 команда.

«Центр» тIисса стратегиялул лябуккулуха зузисса Агентствалул гендиректор, конкурсрал Оргкомитетрал каялувчи Сергей Георгиевскийл бусаврийну, хIакьину Ухссавнил Ккавкказуллай архитектуралул ва градостроительствалул пишакартурал ххуй-ххуйсса проектру давриву Да­гъусттан бусса бур цIа дан лайкьминнавух. Ва конкурсралгу кка­ккан бувну бур цуксса жула агьали ванивух гьуртту хьун ччисса, гьарца номинациялийн лахъсса даражалий хIадур хьуну бувкIсса бивкIшиву.
Камиллун ва ванащал архIал зузиминнан чIа учин ччай бур гихунмайгу тIайлабацIу ва творчествалуву гъира-гьавас.