Ваний гьурттуну ия муниципалитетирттай ва зонардай ххув хьусса 26 учитель. Апрельданий хьунтIисса республикалул даражалийсса конкурсрал хьунийнсса батIаврил мурадгу бия цурда конкурсрал сакиншиндарая ва гикку биттур дансса тIалавшиннардая бусансса.
Гьурттучитурал хьхьичI махъру лавхъуна ДИРО-лул ректор ХIамзат Жамалуттиновлул ва элмулул ва методикалул даврил жаваблувсса проректор Миясат Муслимовал.
ХIамзат Жамалуттиновлул, республикалул конкурсрай гьуртту хьун лайкь шаврищал учительтал барчагу бувну, чIа увкуна учительтуран федерал даражалийсса конкурсраягу ххувшаврищал ва бахшиширттащал зана шаву. Миясат Муслимовалгу мукунма кIицI бувна ДР-лул КIулшивуртту дулаврил ва элмулул министерствалул къулагъасралун ласунтIишиву федерал даражалийсса конкурсрай гьуртту хьун лайкь хьунтIисса учительтал. Пишакаршиву дакъасса, хIисавравун ласунтIиссар миннал психологиялул хIалгу.
– Жу гьашину пикри буварду, щала билаятрайсса учительтал гьуртту хьунтIисса конкурсрай зуща сивсуну ва дакI кьянкьану зулла пишакаршиврул гьунарду ккаккан бан бюхъаншиврул, цIусса модель ишла дурну ва конкурс сакин дуван. ЦичIав хъунисса дахханашивуртту къадурна, жу хIарачат банну зул психология цIакь дуван, сасан бан куннасса журалул давуртту дуван. Дарс – му лекция бакъар. Лекциялул журалийсса дарсру къахьуншиврул, жува цачIу ххал бигьинну конкурсирттай хъунмурчIин хьунабакьайсса масъалартту, – увкуна Миясат Муслимовал.
Ванил бусаврийну, жучIарамур республикалул конкурсгу дувантIий бусса бур щалва Аьрасатнал конкурс кунна, объективнайну ва кьянкьасса тIалавшиндаращал. КIицI бувна ванил зонардай ва муниципалитетирттай конкурсру дувайни итталун багьайсса гъалатIругу.
Гихунмай семинарданий учительтурал дянивсса ихтилатру хьуна пишалийн багьайсса ва федерал даражалийсса конкурсрал хьхьичIми шиннардийсса сакиншиннардаясса ва тIалавшиннардаясса.
